Andam nang tuwadan ni P/Sr. Supt. Romeo Tambungui an Camarines Sur PNP Provincial Office bilang jefe kan PNP sa provincia mala ngani nagpa-araman na ki Gobernador L-Ray Villafuerte huli kan kawaran nin kakayahan nganing mapuho an ilegal na operacion kan jueteng huli ta ini protejido kan aki nin politico.

        Igwa na kuta masalida sa saiyang puesto alagad nag-atras na magpadestino sa PNP Camarines Sur ta habong magpa-kapot sa aki nin politico na iyo an soboot nasa likod kan centralisadong sugal na jueteng sa provincia.

        Napag-araman na si P/Sr. Supt. Joel Alvarez iyo an maribay ki Tambungui, alagad huli ta naaraman an paki-araman nin politico sa dalagan kan PNP sagcod sa operacion kan sugal na jueteng, pinagmarhay na mag-atras na madestino sa Camarines Sur.

        Pigpaliwanag man ni OIC Regional Director Roberto Bondoc kan Bicol PNP na si Alvarez, binawi na an orden na madestino sa Camarines Sur kaya yaon na ki Villafuerte kun siisay an saiyang pipilion na oficial na masalida sa presenting provincial director.

        Si Tambungui haloy nang pigpatanidan kan jefe ejecutivo kan Capitolio Provincia kan Camarines Sur na dapat ipapundo an sinambit na sugal, alagad mayo man nangyayari kaya gusto nang tuwadan an PNP Camarines Sur.

        Dawa na ngani nag-paluwas nin directiva an provincial director na saiyang iimplementar an one strike policy contra sa mga jefe de policia na may gugo kan sinambit na sugal an saindang area of responsibility, dai man efectivo sagcod sana sa patanid mayo man nin accion.

        An mga municipalidad na may operacion kan jueteng iyo an Libmanan, Pasacao, Del Gallego, Calabanga, Pili, Camaligan, Bula, Nabua, Goa, San Jose asin iba pang banwaan.

        Maging si OIC City Director P/Supt. Edwin Nemenzo kan Naga City Police Office nag-asegurar sa mga oficiales local kan City Hall na sa laog nin 24 oras kaya niyang maubos an mga correador, sagcod sana man sa pahayag naglaylo asin dai na nagcacampania contra sa sugal huli kan pigtutubodan na pigsasaway siya kan sarong halangkaw na oficial kan Bicol PNP.