An sector nin transporte sa Camarines Sur an mapasar nin manifesto nganing suportaran an propuestong bill sa duwang Camara sa pagtulod na ibasura na an pig-iimponer kan administracion Arroyo na doce por cientong expanded value –added tax (EVAT) sa mga producto nin petrolio.
An Federation of Transport Operators/Drivers Association and Cooperative (FETRODACO) sa Camarines Sur sa pamamayo ni Rafael M. Duque kan maconduciran nin entrevista kan Bicol Mail nagsabi na maninigo sanang ibasura na an EVAT huli ta iyo man sana an nagpapalangkaw kan precio kan petrolio.
Bilang presidente kan FETRODACO, pamayo kan Piston Development Multi-Purpose and Transport Cooperative asin chairman kan BISCOFED sa Bicol mapa-apod siya nin miting sa miembros kan junta nganing magpasar nin manifesto asin pusog na suportaran an hiro ngonian kan nagkaperang legislador sa pagbasura na kan EVAT sa mga producto nin petrolio.
An ipapasar na resolucuion ipapadara tulos ninda sa Camara-Baja asin sa Senado na parejong may pendienting magkasuhay na propuestong bill sa paglubong na kan controvercial na EVAT.
An sinambit na federacion componido nin sobra sa 30ng manlaen-laen na organisacion nin transporte sa Camarines Sur asin piglalaoman na igwa pang masunod na grupo ninda sa Bicol sa pagpasar man nin kaparejong manifesto nganing ipadara sa Congreso.
Nagtutubod an lider kan sector nin transporte na masunod man an iba pang lider kan saindang sector hali sa manlaen-laen na rehiyon para matanyog na an administracion ni GMA sa pagbasura kan pasakit na EVAT.
Sa Camara-Baja an mga congresista na nagpapadreno kan house bill contra sa EVAT iyo sinda Florencion Noel kan an An Waray, Joel Villanueva kan Citizens Battle Against Corruption. Mujiv Hataman kan Anak Mindanao, Juan Edgardo Angara kan Aurora, asin Justin Marc Chipeco kan Laguna nagkasararo sinda na ma-enmiendahan an Expanded VAT Law particularmente an paghali kan EVAT sa mga producto nin petrolio asin corriente.
Katuyohan ninda huli ta nagsasapo nin pagtios an namamanuan sa padagos na paglangkaw kan lana apesar na makusog na ngani an peso sa dollar, alagad halangkaw pa giraray an precio kan sinambit na producto.
An bill iyo an counterpart sa Camara-Baja sa propuesto sa Senado ni Senador Mar Roxas. Alagad an pigtutulod kan senador an pagsuspendi nin anom na bulan kan EVAT sa producto nin petrolio mientras na pig-aadalan kun dapat ipadagos o kaipuhan nang baklason an ley.
Si Finance Secretary Margarito Teves nagpatanid na an ano man na suspension kan EVAT mawawaran nin l8 billiones pesos nin ingreso an gobierno na gagamiton para sa social services.
An reaacion kan lider kan sector nin transporte pigkukurakot man sana kan mga oficial kan gobierno an fondo mas marhay pang tunawon na makakatabang pa sa saindang sector asin namamanuan Filipino huli ta ciertong mahuros an precio kan lana.
Sa ginibong pag-aadal kan CONDOR, PISTON asin kan KMU kan taon 2006 maabot sa 69.83 por ciento an netong coleccion kan EVAT naghahali sa industria nin lana.
Dati tax exempted an lana, nangyayari an pagcolecta nin buis nganing makabayad an gobierno sa mga utang sa luwas kan nacion asin makahawas sa pagka-bangkaruti.
