Ciudad nin Legaspi -- Sangatos mil (100,000) pesos si ginastos kan oficina rehiyonal kan Department of Health sa Bicol sa campania kun panong makakalikaw an publico sa accidente sa pagpaputok nin mga rebentador sa pagsabat kan pasko asin bagong taon.

        An fondo hali sa sub-allotment kan oficina central kan DOH na ginamit sa saindang advocacy sa oplan iwas paputok kabali na si aviso sa estaciones nin radyo asin television sa Bicol nganing matakot na an mahelig sa pagpa-putok nin makukusog na clasing rebentador.

        Ini an mga pahayag ni Engr. William Sabater, regional sanitary engineer kan DOH Bicol asin nagtutubod an saindang agencia na ini an saro sa intrumento sa paghuros nin l8 por ciento kan mga victima nin paputok kun icocomparar kan nagtalikod na taon.

        Igwa sanang total na 27ng mga iredo sa periodo poon kan Deciembre 2l, 2007 asta kan Enero 2, 2008, an l3 digdi hali sa Camarines Sur o 50 por ciento kan iredo hali sa iba pang provincias kan kabikolan.

        An 50 por ciento kan mga iredo anas menor de edad na an accidente sa pagputok kan picolo na iyo ngonian an may halangkaw na caso dawa na ngani an pakadakula kaini garong capsula na pigpupurot pa kan kaakian.

        Sinabi pa ni Sabater na afuera kan saindang advocacia contra paputok naging instrumento pa an mag-damlag na pagbulos nin uran na dai nakabuelo si tradicional na pagpaputok kan manlaen-laen na clasing rebentador.

        An PNP, media asin local na gobierno nakatabang sa campania sa oplan iwas paputok dawa na ngani dai man nasunod si pagbugtak nin firecraker zone sa mga banwaan asin ciudades.

        Mientras tanto, an na-afectaran kan campania kan DOH iyo an mga paratienda nin paputok huli ta naghuros man an saindang viente.