Pili, Camarines Sur -- Matapos kan report na may nawawarang barangay capitanes antes kan Liga ng mga Barangay (LnB) eleccion sa Camarines Sur kan Deciembre 29, 2007 naging matuninong si resulta kan pirilian na an pigdeclarang gana iyo si brgy. capt. Glenn Gontang kan sadit na municipio kan Gainza.
Caption: Magkalaban na candidato sa LnB – Sa wala si bagong Federation President Glenn Gontang asin Liga President kan Ocampo, Camarines Sur brgy. capt. Rogelio Carbonel, (sa too) parejong nagkasundo na magtatarabangan sa federacion matapos kan eleccion kan Deciembre 29, 2007.
Naging higot si seguridad kan gibohon si eleccion sa provincial office kan DILG mala ngani palibot nin miembros kan PNP asin igwa sinda nin linderos kabali an miembros kan media nganing dai makalaog sa oficina kan pigcoconduciran kan eleccion.
Sa resulta kan eleccion si Gontang nakapatos nin 20ng voto contra sa saiyang kalaban na si brgy. capt. Rogelio Carbonel kan Ocampo, Camarines Sur na nakakoa sana nin l4ng voto.
Duwang capitanes an dai nag-atendir sa eleccion sa dai ma-araman na dahilan asin sinda Rudel Punzalan kan Camaligan asin Ambrocio Perez kan Calabanga.
Napag-araman na si Gontang suportado ni Gobernador L-Ray Villafuerte asin ni Diputado Noli Fuentebella mientras na si Carbonel iyo si candidato ni Diputado Dato Arroyo kan premir distrito kan Camarines Sur mala ngani si mga LnB president hali sa saiyang distrito an nagsuporta sa nadaog na candidato. Saro sanang brgy capt. an nagsinutil nag-bali sa ticket ni Gontang asin ini pigbistong si brgy capt. Nestor Santiago kan Cabusao, Cam. Sur iyo an nang-ganang bise presidente. An campo ni Dato ipinahayag na nagcampania pa sa ibang mga distrito. Si Carbonel, bistado ni diputado Luis Villafuerte kan segundo distrito.
Sa entrevista kan Bicol Mail sa bagong pamayo kan LnB, sinabi kaini na an saiyang sunod na mission na magka-igwa nin unidad an saindang organisacion mientras na tulos man nag-ako nin kadaogan sa eleccion si Carbonel asin nagpahayag nin cooperacion sa ano man na programa kan liga.
Si Gontang na aki ni alcalde Romeo Gontang, nakatalaan ribayan si incumbent LnB president Domingo Briones na dai na nagcandidato kan nakaaging Octubre 29, 2007 huli ta ultimo nang termino.
Tulo nang ex-officio member kan junta provincial kan Camarines Sur anas kaalyado ni Villafuerte, ini sinda SK Federation Chairman Regine Velarde, PCL president Antonio Olano asin si Gontang.
Mientras tanto, matalaan nin seminar sa mga capitanes de barangay sa provincia an bagong pamayo kan liga alagad dai paman sinabi kun nuarin gigibohon.
