Natapos na an pitong bulan na dai reconosido kan City Hall kan Ciudad nin Naga an cuestionableng pagdestino kan Bicol PNP ki P/Supt. Amor Macoy komo OIC Chief of Police niribayan na siya ni P/Supt. Edwin Jose Nemenso na hali pa sa CIDG kan Camp Crame.
Nag-abot na siya kasuodmang aga sa Naga PNP may bitbit nin sadiring computer sa oficina asin stove nganing gamiton sa pagluto mientras na bako siyang Bicolano, taohan siya ni P/Sr. Supt. PD Romeo Tambungui na dating oficial kan CIDG kan sinda parejong destino sa Camp Crame.
Armado siya nin orden sa pag-asumir sa puesto na firmado ni P/Director Edgardo Acuna, director for personnel and records management kan Camp Crame nganing iyo an magribay sa controvercial na OIC COP Macoy, alagad mayo kasuodma sa oficina asin ipinahayag na nasa Camp Semion Ola, Ciudad nin Legaspi.
An pagbugtak nin bagong OIC COP iyo na si na-abalang kahagadan ni alcalde Jess Robredo, oficiales local asin mga sectores na naghahagad na nin pagribay sa liderato kan PNP huli kan maluyang performance mala ngani nagparalangkaw si mga casong robbery hold-up asin iba pang criminalidad sagcod na demoralisado na an miembros kan policia mientras na sinasabayan man nin pag-alamoso an organisacion kan policia ni OIC RD Balligi Agnanayon Tira.
Kan Noviembre l5, 2007 si Deputy Director General for Operation Reynaldo Valeria, pighampang an mga oficiales local sa pamamayo ni Robredo asin mga lideres kan sectores na nagfirma sa open letter ki GMA contra ki Macoy na nagconfirmar kan saindang firma asin paghagad nin pagbabago sa policia kan ciudad.
Sa sinambit na miting pighagad an pagribay sa OIC COP mientras na dai pa nakaka-sumiter kan limang mga nomidado na pipilian kan alcalde na maging fullfledged na COP
Si Valeria nagcierto na babalasahon si Macoy, alagad kasuodma pa sana nag-abot mientras na an orden petsado Deciembre l5, 2007.
Dai na nag-agi sa oficina ni OIC RD Tira an kahagadan na pagribay nin COP huli ta disganado an oficiales local kan ciudad sa mga hiro kaini na risang may pamomolitica.
