CIUDAD DE IRIGA -- Pigtutubodan na naronot na kan local na policia sa lugar na ini an sarong grupo nin mga cattle rustlers pagkatapos na masakote an apat na miembros kaini kan tuminalikod na semana sa bukid na barangay kan San Nicolas, particularmente sa sitio Gabas.

        Susog sa bareta, an PNP-Iriga nakarecibe nin informacion na igwa nin makadudang mga persona an naheling na may guyod na duwang baka asin soboot nakatalaan na ipabakal sa dai man pigngaranan na buyer kan naka-aging Viernes.

        Kan maheling an mga awtoridad, nagprobar na magdulag an mga ini, alagad pinaputukan sinda kan mga polis asin duwa an dinimalas na magsapo nin tama nin bala sa saindang lawas. An mga ini pigbisto sa pangaran na Gerwin Tadeo, 48 kan sitio Tubigan, Sta. Maria, Iriga an 26 aņos na si Junjun Iglesia kan Brgy. Burocbusoc, Buhi, Camarines Sur.

        An duwang matrayumpong nakadurulag nadakop man sana kan sarong grupo nin mga polis sa liderato ni Supt. Tomasito Clet makalihis an pirang oras. An mga ini pigmidbid sa pangaran na Rogelio Azures kan Santa Maria asin Felimon Iglesia kan Brgy. Burocbusoc sa banwaan kan Buhi.

        Duwang baka an nabawi kan mga awtoridad asin puedecir nakabuelta na sa lehitimong maysadiri kaini, makalihis mapabaretang igwa na nin nag-claim kaini pagkatapos maaraman an pangyayari.

        An mga parahabon pig-sangatan na kan mga polis nin casong pagbalgar kan presidential decree 533 o an Anti-Cattle Law.

        An duwang nabadil na mga suspechado na tolos man dinara sa hospital an pigbaretang salbado na man sa kagadanan, alagad ilalaog man tolos sa Iriga City District Jail sa oras na totalmente ng maka-recover sa saindang sinapong tama.