Ngonyan na banggi,
an mga ido nag-untok
sa pagbatok huli sa paputok.

Huli sa takot, napaudo pa ngani
si maisogon na ido na nakagat na
nin sampulong tawo, gadan si saro.

Ta an malas kaipuhan na matunlag
kaya kita minaribok: bawang
laban sa mga engkanto asin aswang,

sinisinturon ni Hudas an mga helang,
tinuturutot an anuman na aksidente
asin kinakanyon gabos na peste.

Sa masurunod na aldaw o pakalayog
sana kan mga kwitis sa langit,
mapuon naman sinda nin pagbatok.

Sa satuyang pagtoninong
iyo man baga an pag-atungol
giraray kan satuyang mga ataman.

Sa madiklom na natad,
may mga aninong naglalakaw-lakaw,
na garo may haloy nang pinagtitimaanan.