An Camarines Sur saro sa provincias kan kabikolan na may problema sa insurgencia dakulang pagpakusog sa PNP asin Philiipine Army nganing mas maging efecto an campania contra sa mga kalaban kan gobierno kun ibabalik kan Congreso an anti-subersion law o an Acta Republica 1700.

        Ini an panindugan kan PNP Camarines Sur kan maconduciran nin entrevista kan Bicol Mail si P/Sr. Supt. Prov’l Director Romeo Tambungui kasunod kan propouestong House Bill ni Diputado Jose Solis kan Sorsogon sa pagbalik kan anti-subersion law tanganing maresolberan na an 39 anyos nang problema sa insurgencia sa nacion.

        Sinabi ni Tambungui na dai na sinda madidificilan sa pag-arestar kan mga suspechadong rebeldeng NPA bakong huli sa pagbasura kan RA 1700 sa pag-repealed kan RA 7636 kan 1992, dai sinda basta maarestar dawa naghihiwawa sa centro kan ciudad o banwaan apesar na mga miembros kan CPA.

        Puedi sana sinda ma-arestar kun may inaatubang na caso criminal sa corte.

        An provincia nin Sorsogon na taga digdi si Solis saro sa dakul na mga incidente nin ralaban kan militar asin rebeldeng NPA na kun haen nagkapera nang mga civilian asin awtoridad an nagkagaradan.

        Kan magvisita si Presidente Gloria Macapagal-Arroyo sa Ciudad nin Masbate kan ika-duwang semana kan Deciembre 2007, an diputado nagsabi na igwa na siyang pendienteng house bill sa pagbuhay kan anti-subersion law.

        Alagad si GMA mayo pang kasimbagan kun saiyang hahagadon sa congreso na tawan nin prioridad an house bill ni Solis nganing ponan nang debatihan an isyu.

        Sa katorceng congresista kan kabikolan dai pa nakakaguno nin suportado an representante kan premir distrito kan Sorsogon.

        An ibang legislador nagpahayag na nin pagcontra huli ta sa presenting proviciones kan Penal Code dapit sa insurrection, sedition, inciting to sedition, asin an Anti-Terror Law o an mapadapit sa Human Security Act bastante na para sa proteccion kan estado contra sa rebelde asin subersivo.