Pinapusog na kan junta directiva kan Federation of Transport Operators/Drivers Association and Cooperative (FETRODACO) sa Camarines Sur an manifesto na nagsusuporta sa magkasuhay na bill sa Camara-Baja asin Camara-Alta sa pagbasura kan doce por cientong expanded value-added tax (EVAT) sa mga producto nin petrolio.
An FETRODACO, componido nin 32 na manlaen-laen na organisacion nin transporte sa Camarines Sur sa pamamayo ni Rafael M. Duque, nagpahayag sa Bicol Mail na sa ginibo nindang board meeting kan Sabado (Enero 5) sa Calabanga, Camarines Sur inaprovaran ninda an panindugan sa bilog na suporta sa propuestong bill sa Congreso na tunawon na an pagabat sa pagbuhay nindang EVAT na pigpapatong kan gobierno sa mga producto nin petrolio.
Nakatalaan ipadara sa Congreso an manifesto ngonian na semana nganing mag-accion na an mga legislador na an mga proponente kinababalihan ninda Senador Mar Roxas, Francis Escudero mientras na igwa man kaparejong house bill na pigtutulod kan nagkaperang partylist representantive sa Camara-Baja.
Si Dr. Domingo Yu, chairman kan Casureco II Consumers Movement (CCM) nagpahayag na “commendable” an accion na iyan kan sector nin transporte sa Camarines Sur na dapat an kaparejong sector sa manlaen-laen na rehiyon magpasar nin kaparejong manifesto nganing itambak sa Congreso asin mapiritan na ipasar na an pagbasura kan controvercial na EVAT.
An EVAT iyo an nagpapagabat sa pagbuhay kan dati nang pobreng namamanuan kaya dapat isacrificio na kan gobierno an dakulang ingreso, sabi kan mga nagtutulod sa pag-tunay kan sinambit na buis
Dinagdag pa ni Yu na inaangat kan CCM an sinambit na sector na mas magiging efectivo kun sinda malansar nin nationwide strike nganing matanyog na an gobierno na kaipuhan nang baklason an buis sa producto nin petrolio.
Nagtutubod an CCM na kun paagihon sa nationwide strike an protesta contra sa EVAT ini an accion na puedi sindang dangogon. An problema sa sainda dai ngani nagkakasararo sa paglansar nin juelga.
Sa hinaman na manifesto dai man kabali kun dai dangogon an pagbasura kan EVAT sinda malansar nin juelga.
Mientras tanto, sinabi pa ni Duque na disconte an saindang sector sa pag-aprovar kan Malacanang kan pag-gunting nin on por ciento sana sa tarifa sa petroleum imports, an makinabang sana kaini si pampasajerong jeepney asin bus na nag-gagamit nin crudo nalingawan na an sector nin trimobile. Huli kaini saindang pigsusuportaran na dakulang cantidad an mababawas sa precio kan producto nin petrolio kun an EVAT an isisikwal kan gobierno.
