Huli kan controvercia contra sa operacion kan bingo sa sarong mall sa centro kan Ciudad nin Naga na harani sa simbahan asin mga colegio, si Alcalde Jess M. Robredo nag-decicion na bawion an pig-isyung permit asin binalik sa Sanggunian Panlungsod an pinasar na ordinanza sagcod nag-orden na magpa-apod nin public hearing.
An pagbawi kan mayor’s permit sa operacion kan bingo petsado Deciembre l6, 2007 alagad pigtukar sa session regular kan consejo kan Martes (Enero 8, 2008). Pigtukahan na magtukaw na chairman kan committee on games and amusement iyo si Consejal Nelson Legasion nganing iyo an mamahala sa pagpa-apod nin mga committee hearing.
Si Allen Reondanga, dating ex-officio member na mina-representar kan SK iyo si dating chairman asin napalusot niya an ordinanza sa operacion kan bingo mga sarong bulan antes siyang magpa-aram sa puesto.
Nadiscubre na na-aprovaran an ordinanza na dai nagpa-apod nin public hearing asin kun igwa man committee hearing sana kan dating ex-officio member. Huli kaini, an jefe ejecutivo local ibinalik sa SP an ordinanza nganing magtalaan nin public hearing.
Na-aprovaran an ordinanza kan mayoriang miembros kan SP asin an nagcontra sana iyo si Consejala Mabeth Lavadia sa dahilan na harani sa simbahan asin mga colegio na makaka-tintar sa mga estudiantes sagcod na makaribaraw sa saindang pag-clase. Si Legasion sana an nag-abstain sa vorotohon.
An ordinanza maigot na pigcontra kan Parish Pastoral Councl kan simbahan kan San Francisco na pera sanang lakad an distancia pasiring sa E-mall an lugar kan pa-binggohan. Afuera pa kaini ginatos na mga surat gikan sa mga estudiantes kan Universidad de Santa Isabel na sa pagtubod ninda dai nasunod an inaapod na participatory process kan local na gobierno.
An mga estudiantes kan USI asin si Jose Quising, Director for Corporate Communication and Public Relations kan kaparejong universidad saindang pigbasehan na apesar kan ordinanza numerado 2007-0l2 na aprovado kan Junio l9, 2007 na mina-declara kan limang taon na moratorium sa ano man na forma nin sugal sa ciudad alagad kabaliktaran an nangyari.
