Pili, Camarines Sur -- Nag-asumir na sa puesto sa Sanggunian Panlalawigan kan Camarines Sur kan Enero 8, 2008 an duwang mga ex-officio member na mina-representar kan Sanggunian Kabataan asin Liga ng mga Barangay asin dai na sinda nag-atubang nin kadificilan nganing reconosiron tulos kan junta.

        Sinda Regine Velarde kan SK Federation asin Glenn Gontang kan LnB Federation armado na nin mga documentos na confirmado na sinda kan saindang national federation na mina-representar kan saindang sector asin calificado matapos ganahon ninda an eleccion kan saindang organisacion digdi sa Camarines Sur.

        Aki sinda nin mga veteranong politico sa saindang banwaan, si Velarde, l7 anyos aki ni dating alcalde Rosito Velarde kan Tinambac, Camarines Sur, bestadong taohan ni congresista Arnulfo Fuentebella kan tercer distrito kan provincia. Si Gontang, aki ni incumbent mayor Romeo Gontang kan Gainza na perang termino na sa puesto ejecutivo.

        Sa acceptance speech kan bagong ex-officio member kan LnB, sinabi kaini na naglalaom siya kan pagtarabangan kan saindang liga asin kan gobierno provincial kan Camarines Sur mientras na igwa na sindang mga pig-andam na programa kan saindang organisacion sa mga barangay.

        Nagpaheling man nin fuersa si Velarde sa paagi kan mga guyod kaining mga suportadores kan maglaog sa session hall kan SP kaibahan an saiyang ama na dating alcalde. Nag-asegurar man siya na dadarahon niya an voces kan jovenes asin saindang mga proyecto na iimplementar ngonian na taon.

        Si eleccion kan SK federation na ginibo kan Deciembre ll, 2007 mientras na sa LnB kan Deciembre 29, 2007 na haloan man giraray nin pagpa-kiaraman nin mga darakulang politico sa provincia.