IRIGA CITY -- Desidido an local na gobierno kan ciudad na ini na dagos ng paralayason an mga pig-aapod na guest relation officers (GRO) sa mga videoke bars asin restaurant bilang parte kan saindang character city program.

        Kan nakalihis na semana, si Mayor Madeline Alfelor-Gazmen kaibahan an ibang oficiales, empleados asin personajes kan PNP an nagsakyada sa mga harong aling-alingan nganing saralakabon an saiyang mga kabaro na nagpapabakal nin halipot na kaogmahan.

        Minsan ngani dikit sana man an mga nagkaturuklo, malinaw an mensaheng naipasabot kan mahigos na alcaldeza: “GRO, magralayas na kamo.”

        Afuera kan campania contra sa mga “sex workers, tinawan man kaini nin plaso an videoke bar owners nganing ribayan nin pangaran an saindang mga commercial establishment, partikularmente an 18, ocho-ocho, blue heaven, Jimer’s asin an famosong Mangoes KTV Bar.

        Dai soboot dapat mawara sa iriribay nindang pangaran an mga tataramon na igua nin relacion sa pagkakan siring kan restaurant, Kitchenette, Canteen, Food Hauz, Eatery, Snack-Inn, Kainan, kakanan asin magin gorotokan.

        Sa pag-anticipar na malulugi man sana sinda kun mapadagos kan operacion na mayo an saindang mayor na putahe o especialty, an ibang videoke bars nagbalyo na sa ibang munisipyo kan Rinconada siring kan Baao asin Nabua. Sinda Mayor Simbulan asin Bongcayao dai pang reaccion sa nasabing bareta.