Apat na mga oficina kan Municipio kan San Fernando, Camarines Sur pigsalakat nin mga parahabon kan matangang bangui kan Enero 4, 2008, alagad sagcod kasuodmang Miercules (Enero 9, 2008) mayo pang pigsusumiter na report sa Police Station kun ano an mga binitbit kan parahabon.

        Si SPO1 Dante Doblon, investigador kan San Fernando Municipal Police Station nagsabi na an report sa policia an mga oficina na pigrangka an mga fuertahan iyo an mayor’s office, accounting office, treasurers office asin an MSWD, alagad an makangalas ta si laptap computer, radio cassete asin iba pang mahalagang kagamitan sa oficina an dai pigpaki-araman envez naruskay sana si ibang mga papeles.

        Si Alcalde Fermin Mabolo an nagsugo sa policia na investigaran an sinambit na incidente nganing maaraman kun ano an mga nawawara sa sinambit na mga oficina maging an mahalagang documentos.

        Pigsisiasat ngonian kan investigador kun igwang nawawarang documentos na iyo an pueding pasikadan na inside job an caso.

        Sinabi pa sa media ni Doblon na sa saindang inicial na investigacion napag-araman na igwang duwang empleados kan Municipal Engineer’s Office an nagturog sa sinambit na oficina asin kabali na sa pig-iinvestigar. Dai paman nginaranan an duwang empleados kan municipio.

        An Police Station nasa atubangan sana kan Municipal Hall kaya ngani naghahapot an oficiales local kun panong nangyari na dai lamang naheling kun may naglaog nin parahabon.

        Pighahalat na ngonian an resulta kan examinacion kan laboratorio kan PNP sa ginibong pagkoa nin mga finger print sa oficina na pigsasabing pigsalakat parahabon.