Pang-iipit na an ginigibo kan PNP sa City Hall kan Ciudad nin Naga, pinaka-premirong estoria na an pagdestino nin OIC Chief of Police karibay kan dai reconosidong OIC COP kinakaipuhan an clearance hali ki Presidente Gloria Macapagal-Arroyo, alagad pigtutubodan na mani-obra ini kan sarong halangkaw na oficial kan Bicol PNP.

Caption: Si Deputy Director Gen. for Operation Reynaldo Valeria kan Camp Crame nasa kabesira kataid sa too si Alcalde Jess Robredo, bise alcalde Gabby Bordado (wala) asin mga lideres kan mga sectores sa Naga na ginibo kan Noviembre 17, 2007. Digdi pig-asegurar ni Valeria na mapadara siya nin bagong OIC Chief of Police kan Naga PNP karibay ni OIC COP Amor Macoy. Nakapako an aseguracion kan may bagong alegacion na an pag-destino nin OIC COP sa Naga kaipuhan an clearance hali ki GMA.

        Namumundo si alcalde Jess M. Robredo apesar igwa nang enot na aseguracion si Deputy Director for Operation Gen. Reynaldo Valeria kan Camp Crame kan makipag-hampangan sa saiya, mga oficiales kan City Hall asin mga pamayo kan manlaen-laen na sectores kan Noviembre l7, 2007 na riribayan na si OIC COP P/Supt. Amor Macoy huli kan maluyang performance mala ngani sunod-sunod kaidto si mga casong robbery hold up, alagad igwa naman nin panibagong dahilan sa proceso sa pagbugtak nin OIC COP na bakong makatutubod sa jefe ejecutivo local.

        Pigbuyagyag ni Robredo sa pina-apod na press conference kan Lunes na saiyang pig-contac si Gen. Edgardo Acuña, director for personnel and records management sa Camp Crame na apesar igwa nang pigpadarang oficial kan PNP sa ngaran ni P/Supt. Edwin Jose Nemenso nganing patukawon na OIC COP, alagad an simbag sa alcalde nagsurat ki PGMA dapit sa pagdestino nin jefe de policia sa Naga.

        An gustong sabihon kinakaipuhan pa an clearance hali ki Presidente Arroyo na sa experiencia kan alcalde ngonian lang nangyari perang termino na siya bilang alcalde.

        Kun masunod sana sa ley an proceso sa pagdestino nin COP masumiter sana nin limang nominadong mga oficial kan PNP hali sa regional command na papaagihon sa provincial office na ipapadara sa oficina kan alcalde na iyo man an pipilian kan alcalde kun siisay an magiging jefe de policia.

        An lakdang ngonian kan alcalde iyo an pagpakusog kan Public Safety Office, mabugtak kan oficina sa Plaza Quezon asin hahagadon na destinohan dawa apat na miembros kan Naga PNP.

        An PSO nagkapera nang mga snatcher asin correador sa ilegal na jueteng an saindang nakadarakop asin iba pang envuelto sa criminalidad kaya kun mayo nang paglaom an City Hall sa PNP yaon an saindang sadit na grupo na pinamamayohan ni Lito Del Rosario.

NEMENSO BALIK NA SA CAMP CRAME
        Si Nemenso preparado na kuta na mag-asumir na OIC COP mala ngani kan magvisita siya sa Naga PNP bitbit na niya an personal na mga kagamitan, kan magvisita siya sa oficina ni OIC RD Balligi Tira nganing magkoa nin mission order naghali sa oficina sagcod na pigtutubodan na igwa naman nag-ulang kaya mayo siyang maginibo magbalik na sa Camp Crame.

        Sa PNP provincial office, sinabi ni Chief Inspector Cerilo Trilles jefe kan PCR na kaipuhan sana ni Nemenso an implementing order hali sa Bicol PNP kun igwa nang orden sa Camp Crame na madestino siya sa Naga.

PAG-ULANG SA PAGTUKAW SA BAGONG OIC COP
        Kan hapoton kan media sa press conference si Robredo kun ano an posibleng dahilan an sabi “sa heling ko delaying sa jueteng tactics” kaya hinagad niya sa media na hapoton si OIC RD Tira kun nuarin poponduhon an jueteng sa Camarines Sur na iyo an posibleng dahilan kan problemang ini.

OIC MACOY NAGKANTIAW KI P/SUPT. NEMENSO
        Dapat an dara ni Nemenso bakong magagabat na bagay envez black and white na hali sa Camp Semion Ola, Ciudad nin Legaspi. Si Nemenso kan mag-abot sa Naga PNP may mga bitbit nang personal na kagamitan kabali an computer, stove na gagamiton sa pagluto kun yaon digdi destino. Ini sa pagtubod niya na maasumir na huli ta an directiva na madestino digdi hali pa sa Camp Crame, ngonian igwa nang ibang dahilan an oficina ni Acuna.

        Si Macoy dai man nakarecibe nin ano man na relieved order huli ta pugol siya kan sarong halangkaw na oficial kan Bicol PNP.