Sarong bagong programa an hinahagadan nin suporta kan mga miyembros kan Kabulig-Bikol asin ini susog sa suhestiyon kan parasurat na si Vic Nierva. An programa iyo an Berso sa Behikulo asin nagmamawot ining darahon an literaturang Bikol sa mas mahiwas na sakop. An ideya bako nang bago alagad kun ini mapangyayari sa satuya, apwera sa libro asin sa mga magazines na nagpupublikar nin akdang Bikol, mapapahiwas kaini an bilang nin parabasa asin may interes sa satuyang literatura. Sa paagi kan Berso sa Behikulo, an sarong paralunad o minsan an mga igwang pribadong sakayan makakatabang tanganing an mga bersong ini magluyap asin dakul man nanggad an makabasa kan mga sinusurat sa satuyang panahon. Lain kaini, bako sanang kontemporanyong mga akda, kundi minsan si mga suanoy na kansyon na luhay-luhay naman na napapara asin nadadangog na sana kun igwang mga espesyal na okasyon na itinatalaan para sa Bikolnon na kultura na bihira man nganing mangyari. Sa suhestiyon ni Nierva, igwang dakitaramon na kataed an bersong Bikol tanganing minsan an mga dayo makabasa asin makasabot kan satuyang mga sinusurat.
Alagad an problema ngonyan, mayong pundo para digdi, buot sabihon naghahanap ini nin suporta sa mga grupo arog baga ngaya kan Rotary o Kiwanis o Jaycess o minsan kan lokal na gobyerno kan syudad. Sa hiling ko saro ining programa na pwedeng hilingon kan pigbabatikos na nominal sana man, an Naga City Council for Culture and Arts (NCCCA) na mayo man daang nagiginibo nin huli na mismo sa kalipotan mismo kan nakatukaw na administrasyon pag-abot sa bagay na ini. Kun baga man, minsan an mga may sadiri nin kompanya nin bus arog kan Isarog, Raymunds o kaya Penafrancia Tours pwede man gayod na gibohon ini bilang sarong bagong paagi nin saindang advertisement asin dagos naman na pagtabang sa mga lokal na parasurat. Kun dai man ini makakua sa mga nasabing sector, maluwas na baad sa mga pundo na sana giraray kan mga parasurat o baad iba pang pribadong tawo na igwang pagmakulog para sa bagay na ini. An siring na mga programa sa ngonyan an nahihiling kkong kaipuhan na suportahan kan gabos na sektor minsan igwa kitang mga ispisipikong katungdan asin orog na kan mga disipulos mismo nin sining sa satuyang rona. Sa ngonyan, mayo man kolektibong asin padagos-dagos na paghiro o pagtinarabang-tabangan sa mga parasurat, musikero, cultural workers asin mga biswal na artista sa Naga tanganing magkaigwa nin mga programang orog na makakapagrokyaw kan satuyang pagka-Bikol. Siring man nagtutubod ako na sa panahon ngonyan, bako naman limitado an paghiro sa bukid asin dagat kan rehiyon na ini, minalaog na kita sa panahon nin pagmukna nin mga bagong dayalogo asin relasyon kan iba pang kultura asin panan’awan sa buhay.
An Berso sa Behikulo an maribay kan ibang mga stickers na satuyang pigdudukot sa satuyang mga gamit, sasakyan, asin mga ringring. Makakatao ini nin panibagong kusog tanganing orog na mamidbid kan satuyang mga kahimanwa an nangyayaring paghiro sa satuyang literatura asin kultura. Namamatian ko na kadakulang a’ngat ngonyan an magin parasurat asin ini bako sanang limitado sa disiplina nin pagtipon nin mga tataramon, kaipuhan man nin siring na mga lakdang tanganing mas orog na makisabayan an satuyang mga istratehiya sa naduguso kan mas makusog na teknolohiya, kapangyarihan kan popular na kultura asin kan media. Mangrangkada lugod an mga bersong ini sa satuyang mga behikulo tanganing mantang kita nagbabaklay, nagbibiyahe, igwa kitang lilinga-lingaon na mga tataramon, mga bersong mahamot kisa sa satuyang duros asin nag-aabang na kan satuyang pag-abot.
