Dawa contrahon kan manlaen-laen na sectores sa Ciudad nin Naga an bingo operation, alagad huli kan magabat na provicion kan PAGCOR, na dai pueding isikwal kan LGU an arin man na grupo o individual na pigtawan ninda nin franquicia sa operacion kan legal na sugal arog kan bingo madidificilan an City Hall na dagos nang ibasura an ordenanza sa pagpadagos kan pa-bingohan sa E-mall.

        Igwa nang decicion an Corte Suprema na dai tinutogot na an ley nacional pueding pugolon kan local na gobierno. Alagad arin man na pigtawan nin franquicia kan PAGCOR an saindang operacion kaipuhan i-regulate kan LGU antes tawan nin permiso, sabi ni Consejal Nelson Legasion.

        Si Legasion, chairman kan committee on games and amusment kan Sanggunian Panlungsod, na naging abstain si saiyang voto kan aprovaran an ordenanza kan nagtalikod na taon nagtalaan nin public hearing sa Enero 18, 2008 na gigibohon sa City Hall Gymnasium asin kabali sa mga invitado iyo si maabot sa 500 na estudiantes kan Universidad de Sta. Isabel na nagsurat contra sa bingo operation, Parish Pastoral Council kan San Francisco Church, mga pamayo kan universidades kan Ateneo de Naga, UNC, Naga College Foundation, Naga City People’s Council asin iba pang sectores.

        An consejal kan mag-abstain sa vorotohan kan ordenanza nagpaliwanag dapat may regulatory ordinance asin iba pang policia na iyo an pueding mangyari sa pag-debate liwat kaini sa SP.

        An ordenanza na pinalusot kan nagtalikod na taon asin pinadrenohan ni dating Consejal Allen Reondaga, ex-officio member na minarepresentar kan SK, pig-veto ni Alcalde Jessie M. Robredo petsado Deciembre 6, 2007 asin binalik sa SP nganing magpa-apod giraray nin public hearing mientras na dai ini ginibo kan dating consejal envez sagcod sana sa commitee hearing.

        An Caceres Amusement and Gaming Corporation, operator kan bingo operation igwa nang napupugolan na provisional authority gikan sa PAGCOR nagpoon na kuta kan saindang pakawat antes kan pasko, alagad pinapundo kan alcalde huli kan inaatubang na controvercia.

        Ano man na resulta sa public hearing isusumiter kan comite sa en banc session kan SP.

        Kabali sa naheheling kan consejal na dapat ipasunod kun aprovaran giraray kan SP iyo an pagpanday nin regulacion kun perang distancia kan lugar kan pa-bingohan sa simbahan, escuelahan, pagbawal sa mga menor de edad asin estudiantes particularmente kun oras nin pagclase.