Bato, Camarines Sur -– “No work, no pay policy” an pinapasunod kan local na gobierno kan banwaan na ini sa bagong administracion ni alcalde Janeatte Bernaldez matapos madiscobre na may 286 na miembros kan 15-30 kan nagtalikod na administracion ni Alcalde Jimmy Gonzales. Ini iyo si mga empleados na na-report sana cada kinsenas kun macobra nin sueldo, sabi pa kan alcalde.

        Nagka-igwa nin maabot sa 1.8 milliones pesos na over-drop na nagresulta sa pagka-afectar kan dalagan financial an local na gobierno.

        Sa entrevista pig-aadalan ni Bernaldez kun saindang sasangatan nin caso an mga envueltong oficiales local na responsable sa paglustay nin fondo.

        An mga miembros kan 15-30ng empleados dai man nahelingan nin mga regular na trabajo o acomplosimiento na naging taohan kan dating oficiales local mientras na dai man ini na-ulang huli ta mayoria kan mga miembros kan Sanggunian Bayan kaalyado kan dating alcalde.

        Efecto kaini, an naging solucion kan presenting administracion iyo an pag-realigned kan prosupuesto ngani sanang masimbagan an panga-ngaipo sa pagsueldo sa empleados asin iba pang mga programa kan LGU.

        Sa P1.8-M na over-drop an haros 80 por ciento kaini nakinabang sana an miembros kan 15-30, sabi pa kan alcalde.

        Si dating alcalde Gonzales mayo pang kasimbagan sa sinambit na isyu na nabutbotan kan bagong jefe ejecutivo local.

        Mientras tanto, sa kaparejong entrevista sa alcalde nakatalaan na magbugtak sinda nin sadiring municipal hospital na igwa nang inicial na P4-M fondo na pig-asegurar si gobernador L-Ray Villafuerte. An hospital kun ma-realisar dakulang bagay sa residentes kan saindang banwaan nganing dai na magdara kan mga paciente sa hospital sa Ciudad nin Naga.