CADLAN, PILI, Camarines Sur -- Nagpaluwas nin kasugoan si Governor LRay Villafuerte sa pag-establiser nin demo farms para sa sweet sorghum, sarong producto na may dakulang potencial bilang alternatibong pagkukuanan nin bio-diesel na puedeng makatabang sa pagresolber kan problema sa padagos na paglangkaw kan crudo sa pan-kinaban na mercado.

        Sa entrevista ki Josefa Panambo, OIC-Provincial Agriculturist, an pig-designar kan joven na gobernador, na mansayan na marhay an implementacion kan nasambit na proyekto, sinabi niya na an sorghum igwa nin manlaenlaen na beneficio arog kan pag-producir nin ethanol, na magigikanan nin biofuel. Sa ngonian, an precio kan crudo sa pan-kinaban na mercado minaabot na sa sanggatos na dolyar ($100) kada barile.

        Afuera kaini, an sararadit na bunga kan sorghum iyo an saro sa mayor na ingrediente na pighahalo sa livestock feeds kan mga lokal na feedmillers, dagdag pa ni Panambo. Kaya, an mga paraoma na interesado na mag-invertir sa sweet sorghum dai magkaka-problema pag-abot sa pagpabakal kan producto asin dakula an tinataong ingreso sa investor.

        An govierno provincial igwa nin limang ektaryang na-identificar na demo farms na tatanuman nin sorghum ngonian na bulan nin Enero sa Tinangis, Pili asin Sta. Cruz, Ocampo na harani man sana sa Deer Farm kan provincia.

        Segun sa mga eksperto, an sweet sorghum madaling itanom asin ini minatalubo maski mainit an panahon. snieves