Apesar kan pag-indorsar kan mga miembros kan junta directiva kan Camarines Sur II Electric Cooperative (Casureco II) sa National Electrification Administration (NEA), sobra na sa duwang taon an nakaka-agi na maging permanteng General Manager si Engr. Rodelo Pasumbal, alagad binasura na envez pinapabalik siya sa dating puesto komo pamayo kan engineering department.

        Si NEA Deputy Administrator Pablo Pan nagpaluwas nin directiva sa OIC GM sa tahaw kan dai nahelingan nin marhay na performance sa pagkapot kan puesto mientras na nakatalaan na magpa-publicar sa periodico nacional sa paghanap nin mga calificadong aplicante sa puesto na babayaan ni Pasumbal.

        Dai na siya nakakoa nin kasurog sa junta directiva nganing i-indorsar giraray siya sa NEA envez nagpasar nin resolucion sa pagpa-publicar na kan vacanteng puesto, alagad pigpapadagos siya sa oficina sagcod na mayo pa nin giraray.

        Sa lado kan OIC GM, ipinahayag na dai naman ini interesado sa puesto envez magbalik na sana sa engineering department.

        An pagpadalagan ni Pasumbal kan cooperativa nag-aatubang nin mga controvercia sagcod an nagputok na report sa laog kan manijamiento sa pagbaranga-banga kan mga director asin iba pang oficiales kan 300 mil pesos na pinaluwas pang ayuda sa campaign fund kan APEC party-list, alagad ini saindang pigpahimotikan.

        Dai niya napa-angat an categoria kan cooperativa sagcod na pa-permanente sana sa category E apesar na an Casureco II iyo an pinaka-dakulang cooperativa sa Camarines Sur.

        Napag-araman na plano kan ibang miembros kan junta directiva na idesignar si finance manager Jane Barrameda bilang OIC mala ngani nagtalaan nin board meeting kasoudma, nagpalyar an plano kan dai nadagos huli kan kawaran nin qourom.

        An pangaran ni Barrameda saro pa sana sa nagluluwas na pueding patukawon na general manager sa tabang nin politico.

        Kan hapoton siya kan Bicol Mail sa paagi nin telepono sa pig-declarang vacanteng puesto sinabi kaini na dai man siya nag-apply sa NEA, alagad posibleng patukawon siya bilang OIC.

        An Casureco II Consumers Movement sa pamamayo ni dating board president Dr. Domingo Yu nag-iindorsar ki Barrameda na maging general manager huli ta aram niya an kakayahan bako lang bilang sarong CPA envez aram na niya an pagpadalagan kan cooperativa nin corriente.

        Dinagdag pa ni Yu na marhay man kuta si Pasumbal, alagad kaya sanang butongon sa dungo kan mga director.