Pagbalga sa local autonomy kun an pag-pili kan jefe de policia sa sarong banwaan o ciudad papaki-araman pa kan Malacañang mientras na igwa nang provicion sa local government code na an alcalde iyo an may poder mag-pili kan papatukawon na Chief of Police sa saindang Police Station.
Ini an reaccion ni alcalde Ben Decena kan Bula, Camarines Sur sa mga pahayag ni P/Director Edgardo Acuña kan Camp Crame ki alcalde Jessie M. Robredo kan Ciudad nin Naga kan dai madagos maka-asumir sa puesto bilang OIC COP si P/Supt. Edwin Jose Nemenso sa Naga City Police Station huli ta kaipuhan pa an “clearance hali ki Presidente Gloria Macapagal-Arroyo”
Napangisi sana si Decena kan informacion na kaipuhan pa an hali ki GMA nganing makatukaw sana an OIC COP kan Naga. Malinaw na pagsinutil sa local autonomy huli ta prerogative kan jefe ejecutivo local an sinambit na poder.
Si Acuna iyo pa an nagpadara ki Nemenso sa Naga PNP nganing iyo an magtukaw na OIC COP para ribayan an dai reconosidong OIC P/Supt. Amor Macoy, biglang nagkibrada kan orden, mayong naheheling na validong dahilan si Robredo kan alegacion kan Camp Crame envez naki-aram an Bicol PNP..
An League of Municipalities of the Philippines (LMP) Camarines Sur nag-rereclamo sa kawaran nin accion kan PNP provincial office sa pamamayo ni PD P/Sr. Supt. Romeo Tambungui sa kahagadan na ribayan na an saindang jefe de policia. Ini apesar na kan sinda mag-asumir sa puesto bilang alcalde kan Julio 2007 hinagad an pagbalasa kan COP dai man nangyayari.
Si Decena, kabali pa sa halaba na an liog nin mga alcalde sa Camarines Sur kahahalat sa comandancia kan PNP nganing maribayan na an saindang COP.
Alagad napag-araman sa PNP provincial office na dai makabalasa si Tambungui asin pa-ondrahan an kahagadan kan mga alcalde huli ta kaipuhan pa an “clearance” gikan sa Bicol PNP sa pamamayo ni OIC Regional Director Balligi Agnanayon Tira mientras na posibleng igwang maligis na taohan kan halangkaw na oficial kan Recom V.
Sa Calabanga, asin dakul pang mga municipalidad sa provinciang ini an pighahagad na ribayan na an saindang COP, padagos man giraray na pigtuturogan kan PNP provincial office.
Pigtutubodan na nangyayari ini huli kan operacion kan ilegal na sugal na jueteng sa Camarines Sur na may proteccion sa ibang halangkaw na oficial kan PNP.
