Maabot sa 85 por ciento kan personajes kan Philippine Drug Enforcement Agency (PDEA) sa Bicol an tinuwadan an agenciang ini envez nagbalik na bilang regular na miembros kan Philippine National Police mientras na an kadakli sa sainda bakong mga civil service eligible.
Alagad an mayor pang dahilan ta nagpaso na si limang taon na transition period kan Julio 2007 na kun haen pinapapili sinda kun mabalik sa PNP o matenir sa PDEA, sabi ni Chief Inspector Nelson Del Socorro, dating assistant regional director kan Bicol PDEA asin kabali na sa naghali nganing magbalik sa PNP mala ngani siya na ngonian an jefe kan Traffic Management Group (TMG) sa Camarines Sur.
Nawaran sindang interes na magpadagos sa PDEA huli ta atrasado an promotion asin dai pa natatawan nin marhay na puesto apesar na mga calificadong oficial.
Pigbuyagyag ni Del Socorro na an numero unong black mail sa sainda na dapat sinda mga civil service eligible asin dai pig-oondra an Napolcom eligible na kabali pa sa problema na magiging civilian employees an saindang categoria mala ngani an retirement ninda 65 anyos na compulsary, kun sa PNP sagcod sana sa edad na 56 anyos.
Nagkaka-igwa na nin efecto sa pagluya sa campania contra sa ilegal na droga an kawaran na nin personajes kan PDEA asin digdi sa Camarines Sur “zero” kun igwa man iyan mga asset na sana, sabi pa kan dating assistant RD kan Bicol PDEA.
Si Chief Inspector Joven Parcong, regional director kan sinambit na agencia sa Bicol an padagos na sa pagkalap nin mga miembros alagad napag-araman na mayong aplicante kun igwa man si mga asset na bakong mga civil service eligible.
An PDEA nasa irarum kan Office of the President dawa na ngani si mga miembros kaini hali sa PNP.
Huli sa kakulangan kan saindang personajes an nangyayari nagtatarabangan an PNP, PDEA asin NBI kun igwang operacion laban sa sindicato sa ilegal na droga.
An mga local na gobierno kabali sa saindang programa iyo an campania laban sa ilegal na droga asin an saindang katuwang sa ngonian iyo an PNP huli ta dai na malaoman an PDEA ta mayo na nin personajes.
Mientras tanto, dawa na ngani dakul na an nagralayas sa PDEA pinalawig pa nin anom na bulan an transition period.
Kabali sa dahilan kan Camp Crame na pabalikon na an miembros kan PDEA sa PNP nganing gamiton sinda sa campania laban sa insurgencia asin sa criminalidad.
