Nagsabi na nin tamang accomplishment report sa rehabilitacion kan mga nadestrosong edificio kan escuelahan an Department of Education (DepEd) Bicol sa atubangan ni Secretary Jesli Lapus sa ginibong press conference sa Triangulo Elementary School, Ciudad nin Naga matapos gibohon si inaguracion kan two storey school building digdi kan Enero 23, 2008.

        Si DepEd Regional Director Celedonio Layon Jr. nag-ako na kan magvisita sa Camarines Sur si Presidente Gloria Macapagal-Arroyo kan huring semana kan Noviembre 2007 nasa 50 asta 60 por ciento pa sana si acomplisimiento kan rehabilitacion kan mga escuelahan sa Bicol.

        Si GMA naging visita sa RDC meeting na ginibo sa Capitolio Provincial kan Camarines Sur kan huring semana kan Noviembre 2007, kan magpa-abot nin report an pigpadarang representante ni Layon sa sinambit na meeting pigsabi nasa 90 por ciento na, alagad ini pigcontra kan mga gobernador sa Bicol huli ta dai bensido kan pinaabot na accomplishment report mientras na dakul pa an naheheling na garabang classroom sa saindang sakop na provincia.

        Sinabi kan director na sa ngonian maabot na sa 98 por ciento an saindang rehabilitacion, alagad kun igwang na-abala huli ta dai tulos napasubasta an proyecto kaya ngani na-atraso man si pagpoon kan patrabajo kan mga contratista.

        An oficina ni Layon naging estricto na sa pagpa-monitor kan implementacion kan rehabilitacion kan nadestrosong school building kan supertypoon Reming kan Noviembre 30, 2006 nganing maseguro na tama an pigsusumiter na report sa saiyang oficina.

        Kun igwa pang natatadang dai matapos-tapos si yaon na sa puerang mga bukid na barangay mientras na deficil an pagtransportar kan materiales sa construccion. An bagay na ini na-intindihan man ni Secretary Lapus.