Cong. Dato Arroyo mayong naitabang
Perang taon na kulang nin mga doctor an dakulang Bicol Medical Center, tinabtaban pa nin dakulang fondo kan gobierno nacional nin nagcacantidad nin P35 milliones na naging na sanang 65 milliones, sabi ni Director Dr. Edgar Esplana sa miembros kan media sa Ciudad nin Naga.
Marhay ngani ta nakaka-ipos an hospital nin dagdag na mamahalon na ekipajes sa tabang ninda congresista Luis Villafuerte kan segundo, Noli Fuentebella kan tercer distrito asin Nancing Alfelor kan cuarto distrito gabos kan Camarines Sur afuera ki diputado Dato Arroyo kan premir distrito na mayong nadarang ayuda dawa cienco centavos.
Si DBM Secretary Rolando Andaya, dating congresista kan premir distrito dakula man si naitabang na ayuda sa BMC.
Nagpa-abot paman nin sentimiento si Esplana sa mga Bicolanong senadores na sinda Joker Arroyo, Francis Escudero asin Gringo Honasan na mayong na-itabang sa dakulang hospital kan Bicol.
An mga congresista kabali sa pigkoanan ninda nin fondo gikan sa saindang discretionary fund.
Igwa sindang pigtagamang ayudang fondo sa mga pobreng paciente sa hospital na dakulang bagay sa nagtitios na familia.
Alagad pig-omaw kan jefe kan BMC an bakong bicolanong dating Senador Juan Flavier na kan yaon pa sa puesto nakadara nin ayudang 600 milliones pesos sa Philippine General Hospital (PGH).
Nasambitan kan director kan BMC na naghaharali an saindang doctor asin nurses huli ta hababaon an narerecibing sueldo kaya natrabajo na sana sa abroad huli ta mas halangkaw an saindang narerecibing sueldo cada bulan.
Mas marhay pa si mga oficial asin empleados kan Napocor, GSIS, asin SSS haralangkaw an sueldo igwa pa nganing 30 asta 50 mil pesos na allowances, alagad an mahalagang trabajo kan doctor an napabayaan kan gobierno, sabi pa kan director.
Sa lado ni diputado Arroyo, nagsimbag sa sinambit na isyu iyo an saiyang staff na si Bobby Matamoroza na segun saiya an ayuda kan diputado kan premir distrito pigdadara na directa sa mga residentes sa paagi kan medical mission. (report hali ki RR).
