Para sa mga estudiantes asin puedi sa pampublico na ma-uusar kan mga evacues en caso may mga calamidad orog na kun may tubig baha. Ini an mga pahayag ni DepEd Secretary Jesli Lapus sa magkasurohay na inaguracion kan tulong typhoon resistant na school building sa Ciudad nin Naga, Baao, asin Minalabac, Camarines Sur na kun haen siya an nangenotan sa pagbasbas kan sinambit na mga edificio.

Caption: PRESS CONFERENCE - Si DepEd Sec. Jesli Lapus (ika-duwa hali sa wala) nagpaliwanag sa miembros kan media sa Ciudad nin Naga kan C.A.R.E. School Bldg. Program sa mga escuelas publica asin iba pang mga programa sa educacion. Sa retrato sa too si DepEd Bicol Dir. Celedonio Layon Jr., kataid ni Lapus si alcalde Jess Robredo asin bise alcalde Gabby Bordado (sa too) kan Ciudad nin Naga.

        An sinambit na programa ginibo kasuodmang aga sa ginibong pagvisita sa Camarines Sur kan DepEd Secretary sagcod nag-atubang sa press conference na ginibo sa Ciudad nin Naga.

        An mga edificio two storey four classroom na nagcacantidad nin 4 milliones pesos cada school building sa lindong kan C.A.R.E school building ni President Gloria Macapagal Arroyo na kun haen igwa nin kagabsan na l3ng edificio sa public school sa Camarines Sur.

        Pigconstruir an typhoon resistant na escuelahan digdi sa Bicol huli ta parating nilalamasa nin makukusog na bagyo arog kan Melinyo asin Reming na nangyari kan bulan nin Septiembre asin Noviembre kan taon 2006 na kun haen billiones pesos si destroso sa mga classroom sa kabikolan.

        Igwang comfort room cada classroom kaya ini magagamit bako lang sa pag-adal kan estudiantes envez kan evacues sa panahon nin calamidad, sabi pa ni Lapus.

        Mientras tanto, nag-asegurar man nin tabang an DepEd Secretary sa Ciudad nin Naga nin cantidad 8 milliones pesos nganing taposon na an contruccion kan school division building mientras na pigseguro man ni alcalde Jess Robredo an dos milliones pesos na counterpart kan local na gobierno.