Apesar kan resolucion kan League of Municipalities of the Philippines (LMP), Camarines Sur chapter sa PNP na hinahagad na igalang an Local Government Code sa pagpili nin jefe de policia dapat yaon man giraray sa poder kan alcalde, alagad nagsinutil man giraray an Bicol PNP sa basang na paghali ki P/inspector Joel Guerero kan Libmanan Municipal Police Station.
Sa “daing ugali” an ginibo ni OIC Regional Director Balligi Agnanayon Tira kan Bicol PNP sa pinaluwas na relieved order ki COP Guerero, na-araman ko sana kan magpa-araman na siya sa oficina na hinahali na sa Police Station kan banwaan nin Libmanan. Mayo akong narecibi nin ano man na comunicacion hali sa PNP nganing mag-coordinar lamang sa LGU, sabi ni Alcalde Rodolfo Jimenez.
Kun igwang regular na ginigibong pagbabalasa nin COP dapat igalang niya man an oficiales local huli ta importanteng marhay an coordinacion kan policia sa pagmantenir kan paz y orden
An reclamo ni Jimenez kaparejo man kan ginibo ni Tira sa Naga City Police na nagdesignar nin OIC COP na mayong coordinacion ki alcalde Jess Robredo.
Pigribay ni Tira ki Guerero iyo si P/Chief Inspector Efren Tublan na hali pa sa Camarines Norte, kaya nagpatanid si Jimenez na dai niya ini rereconosiron sagcod na cuestionon an pagdesignar kan bagong OIC COP. Si Guerero an i-aapon sa PNP provincial office kan Masbate.
Dakul nang mga kaparejong caso sa Camarines Sur an ginibo kan Bicol PNP kaya ngani an LMP nagpasar nin resolucion na pighahagad ki PNP Chief Director General Avelino Razon Jr. na sunodon ni Tira an tamang proceso sa pag-designar nin jefe de policia.
Sa PNP Provincial Office kan Camarines Sur pig-confirmar ni P/Supt. Cerilo Trilles, jefe kan PCR na igwa nang relieved order an OIC COP kan Libmanan na efectivo kan Enero 2l, 2008 hali sa oficina ni OIC RD Tira.
An oficina ni Provincial Director P/Sr. Supt. Romeo Tambungui an mayong participacion sa pagbalasa naman nin mga COP sa Camarines Sur.
Kabali sa pinadarahan nin orden iyo si COP Alejo Hernandez kan Bato PNP, idedestino na sa PNP Catanduanes mientras na si Insp. Teodoro Boletic COP kan Calabanga PNP an mayong reclamo an alcalde huli ta haloy nang pinaparibayan kan mga oficiales local sa pamamayo ni alcalde Evelyn Yu. Si Boletic an pigdestino sa Masbate PNP provincial office.
