An Naga City PNP dai na sakop kan Camarines Sur PNP provincial office matapos aprovaran na kan National Police Commission (Napolcom) an resolucion kan City Hall na naghuhurot na i-upgrade na ini sa Naga City Police Office (NCPO), si P/Sr. Supt. Edwin Jose Nemenzo iyo an pinaka-premirong pamayo na aapodon na City Director.

        Sa pagsuhay na kan NCPO sa PNP Camarines Sur an ano man na directiva maghahali na sa Bicol PNP sa Camp Semion Ola sa Ciudad nin Legaspi.

        An General Order DTL-O8-01 petsado Enero 18, 2008 na nagsasabi na “effective this date, Naga City Police Station is hereby upgraded as Naga City Police Office and categorized as “Type C” and placed under the direct Administrative and Operational Control of the Regional Director, Region V.”

        An pag-isyu kan general order susog sa poder kan Chief, PNP sa irarum kan section 26 kan RA No. 6975, firmado ni P/Chief Supt. Romeo T. Ricardo, CEO IV kan Camp Crame.

        Si PNP Chief Director General Avelino Razon Jr. maabot sa Ciudad nin Naga para sa formal na ceremonia, alagad dai pa pigsabi ni Nemenzo kun anong petsa gigibohon an actividad.

        Si Alcalde Jessie M. Robredo an nag-asegurar nin suporta sa bagong OIC City Director kan ini mag-courtesy call sa oficina kan alcalde kan Martes nganing mapapusog an liderato asin iba pang mga facilidades kan NCPO.

        An Sanggunian Panlungsod asin Peace and Order Council kan City Hall nagpasar kan magkasuhay sa resolucion na pigsumiter ki Napolcom asin dai nahaloy igwa nang resulta pakatapos sana na mapahali na an controvercial na OIC COP P/Supt Amor Macoy na dai reconosido kan ciudad huli ta dai nag-agi sa proceso an pag-designar kaini ni dating OIC RD Balligi Tira.

        Si Nemenzo, na nag-asumir palang sa puesto kan Enero 29, 2008 nag-informar sa mga miembros kan policia kan Ciudad huli ta ini dakulang bagay mientras na kaipuhan dugangan an fondo sagcod na pueding maging nang 500 an miembros kan policia digdi.

        Kan mag-atendir siya sa POC meeting kan Martes na hapon, ipinahayag kaini na kun dai na-aprovaran an convercion kan Naga PNP na maging NCPO dai siya matugot na madestino digdi huli ta an kaipuhan digdi may ranggo sana nin Police Supt.

        An numerong 500 na destinong polis digdi kaipuhan pa muna mag-agi sa DBM nganing madugangan nin fondo.

        Sa laog nin sarong taon dapat an presenting oficina kan policia kan Ciudad ibalyo na sa PNP provincial office kan Camarines Sur na namumugtak sa Concepcion Grande, Ciudad nin Naga huli ta an oficina kan provincial director dapat iluwas na sa Naga.

        Kabali pa sa nakatalaan na iimplementar iyo na an mga Police Sub-Station sa mga centrong barangay kan ciudad asin si nasa upper barangay icoconvertir naman sa mga Police Station na madesignar na nin chief of police cada station.

        Sa saiyang pakikipag-hampangan sa miembros kan policia hinagad kaini an cooperacion asin ano man na sugestion dapat directa sanang ipaabot sa saiya huli ta kun ini nadadapat kaipuhan na ipasunod.

        Mientras tanto, saiyang pig-asegurar sa mga oficiales local na mayong magdadanay na operacion kan ilegal na sugal na jueteng asin kun naglalaog an mga correador sa area of responsability kan NCPDO dapat arestaron asin sangatan nin caso sa corte

        An saiyang pigribayan na OIC COP an naka-destino ngonian sa Camp Semion Ola sa Ciudad nin Naga.