Maabot sa 90ng presoniro kan Bureau of Jail Management and Penology (BJMP) kan Naga City District Jail na na-silotan na kan corte an dai ma-itransportar pasiring sa National Bilibid Prison (NBP) sa dahilan na mayo nin fondo an district jail dai na ngani nakakabayad kan moroso sa electric bill kan Casureco II.
Kabali sinda sa mga na-sentenciahan kan corte poon kan bulan nin Octubre, Noviembre asin Deciembre 2007, naghagad na nin asistencia financial an oficina kan District Jail sa saindang central office alagad inabot na nin Enero 2008 alagad mayo pang accion an saindang agencia.
Sa report ni Jail Chief Inspector Benedicto Loba, District Jail Warden na pigsumiter sa Naga City Peace and Order Council ipinahayag na entero nang nagkukuno-kuno an saindang mga selda mientras na sagcod sana sa 120ng capacidad an dapat ilaog sa district jail.
Igwa man sadiring vehiculo an district jail, alagad dai mapadalagan sa south road mientras na ferming raot-raot bihira pa nganing magamit sa pag-viaje kan mga preso kun dadarahon sa corte sa Naga
Nagsakat na sa 295ng mga preso kulang pa ngani sinda nin personajes na iyo an inaatubang na problema kan oficina na dapat matawan na nin prioridad.
Delicado pang maputolan nin servicio nin corriente kan Casureco II ta dai na sinda nakakabayad kan electric bill sa nagkapera nang bulan, atrasadong mag-abot an fondo hali sa BJMP central office.
Enot nang naputolan nin corriente an BJMP Naga perang taon na an nakaka-agi sagcod na napiritan na mag-gamit nin generator nganing maibitaran an ano man na incidente sa laog kan district jail.
Dawa na ngani arog kaini an problema mantenido an paz y orden mala ngani “escape free”, sabi pa kan Warden.
Mientras tanto, an concretong kudal an kahiwasan kaini an peligroso nang magrampahod ano man na oras kaya ini an saindang pighahaditan kun may mag-provar na magdulag na preso.
An local na gobierno kan City Hall an dai man makatao nin ayuda financial huli ta limitado sana sinda sa office supplies asin allowance sa personajes kan NCDJ.
