“Sinda an nagtao dai man kami nag-request” ini an mga pahayag ni Director Edgar Esplana kan Bicol Medical Center (BMC) sa isyu kan pagtaong tabang sa hospital kan mga congresista kan Camarines Sur sa tahaw kan pagparababa kan prosupuesto kan hospital hali sa dating P100 milliones naging na sanang P68 milliones kan nagtalikod na taon 2007.

        Igwa nganing congresista an nagtataong fondo sa National Kidney Institute hali sa saindang discreationary fund. Mala ngani si dating Senador Juan Flavier sa doceng taon sa Senado nakatao man nin ayudang 600 milliones pesos sa Philippine General Hospital.

        Dai nongka ako naghagad nin tabang ki Congresista Luis Villafuerte, arog ki DBM Secretary Rolando Andaya Jr. bako nang congresita nagtatabang pa siring man ninda Congresista Noli Fuentebella asin Nancing Alfelor.

        Sa saiyang pagsabi nin totoo na mayong na-itaong ayuda si Congresista Dato Arroyo, an congresista kan premir distrito kan Camarines Sur nagsimbag sa prensa na nangyari ini huli ta dai man naghagad nin asistencia financial an BMC sa saiya.

        “Ay de ma-request ako marhay ngani yan ta aki kan presidente”, sabi pa kan director kan BMC.

        Sa entrevista kan BM sinabi kaini na “ako kaya natuod dai magpara-pakilimos, para sa gabos ini halion ta sa isip ta cada kaipuhan nag-dedefende kita sa gobierno, halion ta sa isip ta na kita para-pakilimos”.

        Hinapot ako kan media nagsabi ako na mayong na-itaong ayuda si Arroyo, dai man ako masabi na igwang tabang na dai man palan. Aram mo kaya kun gusto ta maging toltol an gobierno dapat sabihon ta si totoo, dai ta pagpara putikan an publico, sabi pa kan director.

        An pigtatawan ngonian nin prioridad kan diputado kan premir distrito iyo an Tubig, Kalsada asin Oportunidad.