PILI, Camarines Sur -- Hinagad na an tabang ni Congresista Dato Arroyo kan premir distrito kan Camarines Sur kan Sanggunian Panlalawigan na patalsikon na sa puesto si Director Orlando Roces kan Department of Public Works and Highways sa Bicol huli kan palpak na implementacion kan rehabilitacion kan Andaya Highway.

        Sa entrevista ki Vocal Carlo Batalla kan premir distrito kan Camarines Sur sinabi kaini na saiya nang pighurot ki Arroyo na an solucion sa problema sa patrabajo kan Andaya Highway iyo an ribayan na si Director Roces.

        Nagpabulos na nin 250 milliones pesos an DPWH para sa rehabilitacion kan raraot nang Andaya Highway, atrasado an pagtapos nagkapera nang veces nag-asegurar sa media na tataposon alagad inabot na kan taon 2008 iyo man giraray.

        Dakul na nin mga accidente sa tinampo asin nagkapera nang binawian nin buhay huli kan kakulangan nin mga sign board asin alanganin pa sa linea an construccion nganing tawan nin buelo an vehiculos kaya may mga nadidisgraciang mga sasakyan.

        An reblocking project iyo ngonian an pigtatapos dai makatao nin malinaw na paliwanag an oficina ni Roces, an parating dahilan inabot nin panahon nin tag-uran.

        Dinagdag pa kan Vocal kan premir distrito na ipapa-apod ni Arroyo sa congreso an director kan DPWH tanganing hagadan nin paliwanag mientras na afectado na an viaje sa Bicol pasiring sa Manila.

        Mientras tanto, sa sunod na session regular kan SP Camarines Sur si Roces pig-invitaran nganing aramon an kamugtakan kan proyecto kan Alfelor Highway na may rutang Buhi pasiring sa Malinao, Albay.

        An Alfelor Highway, dating may pangaran na Boncodin Highway alagad kan magtukaw si Congresista Nancing Alfelor pigribayan nginaranan sa saiyang ama na si dating gobernador Felix Alfelor Sr. (report hali ki RR)