IRIGA CITY -- Pigbabana-banang dagos ng mag-alsom an relacion sa paghultanan kan mga Alfelor asin kan mga oficiales kan ciudad na ini na biristadong kaalyado ni dating Gobernador asin ngonian Diputado Luis Villafuerte kan Segundo Distrito.
Ini huli man kan ginibong pagdenuncia ni Consejal Rodolfo Tino Jr. ki Mayor Madelaine Alfelor-Gazmen makalihis na isugo kaini na dai ibali an duang staff kan consejal sa listahan kan mga casual asin contractual employees na recepiente nin dugang na christmas bonus kan nakalihis na Deciembre 2007 sa sahot na an dua “ghost employees.”
Ginibo ni Tino an pag-alburuto contra sa alcaldeza sa paagi nin privilege speech sa sesyon regular kan Sangguniang Panglungsod (SP) kan naka-aging Enero 14, kun haen pigsasahotan niya si Alfelor-Gazmen na namomolitica.
“Posibleng an pagsuporta ko sa resolucion ni Consejal Rudy Mirando para sa 10% dagdag na sueldo kan mga empleados an mayor na rason kun taano ta pig-sugo kaini na dai ibali an dua kong staff sa listahan kan mga recepiente kan dagdag na 2,500 pesos,” susug sa pahayag ni Tino sa Bicol Mail.
Dating kaalyado si Tino kan mga Alfelor, alagad makalihis an 2004 Elections, ini nagbalyo sa partido kan mga Villafuerte. Kan nakalihis na 2007 Elections, liwat na nag-iribahan an mga Alfelor asin an grupo ni Tino sa lindong kan “Unity Ticket.”
Apuera ki Tino an ibang kaalyado kan gurang na Villafuerte sa ciudad na ini na nakatukaw sa fuesto iyo sinda Vice Alcalde Jose Villanueva Sr. asin an mga consejales na sinda Rufino Villagomez, Omar Ampongan asin si Mirando na ka-kolor man ni Gob. L-Ray Villafuerte.
Sa apat na mga pro-Villafuerte, si Villagomez an nanonotaran na mahamis an relacion sa mga Alfelor mala ngani ta kan naka-aging pirilian, ini pa an ginibong campaigan manager kan Unity Ticket.
An mga political observers digdi an nagpahayag na nungcang mangyari pa an pagsalamog nin fuersa kan gurang na Villafuerte asin kan mga Alfelor sa mga masurunod pang eleccion huli kan presenteng situacion.
Enot nang napabareta na si Vice Mayor Villanueva an ma-aspirar para alcalde kan ciudad kun encaso magdalagan giraray sa kabaing na fuesto si dating Alcalde Manny Alfelor mantang si Alfelor-Gazmen an madalagan sa kargong congresista pag-abot kan 2010.
