OLFINDO

“At least kahit papano vindicated ako dito sa nangyaring ito na nagpapatotoo lang na ang mga sinabi sa aking ng taong ito ay puro lang paninira, kaya sinampaan ko siyang libel at napatunayan sa corte na siya ay nagsisinungaling kaya siya na found out na guilty”. Ini an mga comentario ni District Engr. Guilbert Olfindo kan Camarines Sur I Engineering District kan DPWH sa Baras, Canaman, Camarines Sur matapos saiyang marecibe an deci-cion kan corte na an acusadong contratistang si Regina Cyril Paraico, nasilotan na malaom sa karcel nin poon sa duwang taon, apat na bulan sagcod sa apat na taon asin pigsugo na magbayad nin P500,000 na danyos asin P80,000 para sa attorney’s fee.

        Si Juez Zenaida R. Daguna kan RTC Branch 19 sa Manila iyo an nagpaluwas kan decicion na naprovaran na nagka-igwa nin motivo asin malicia sa pagsurat sagcod na pigcircular sa manlaen-laen na pamayo nin agencias de gobierno kabali sa pigpadarahan iyo si Presidente Gloria Macapagal-Arroyo.

        Napag-araman ni Olfindo na an acusado posibleng magplantiar pa nin apelo kan decicion kan hababang corte sa Corte de Apelacion.

        An casong ini si Olfindo iyo pa kaidto an District Engineer kan Camarines Sur II Engineering District digdi sa Camarines Sur kan taon 2001 asin saiyang pigpahayag sa entrevista kan Bicol Mail na ginamit kan acusado an media nganing ratakan siya kan mayong pruebang mga pigsasahot na anomalia sa saiyang dating oficina particularmente an pagmakis-makis kan subasta sa proyecto nganing paboran sana an saiyang paboritong contractor.

        Naging ugat kan caso segun sa documento asin reclamo kan contratistang si Paraico kan dai siya soboot tugotan bilang qualified contractors nganing maka-participar sa subasta sa proyecto na may cantidad nin P71,157,644,000.00 huli ta may pig-paboran na contratista.

        Alagad dai man ini na-provaran na si Olfindo an kaggibo mientras na bako man siyang miembro kan Bid and Awards Committee.

        An lakdang kan acusado nagsumiter kan saiyang application for bidding kan Septiembre 18, 2001 sa oficina ni Antonio Molano, pamayo kan PBAC kan oficina central kan DPWH, alagad dai man inaprovaran.

        Sinabi sa reclamo ni Olfindo na grabe si ginibong panraratak sa saiya na mga surat huli kan naglalaog nin mga malicious, fictitious, untrue, and fabricated imputation sa mga saltong ilegal na gibo sa pagfuncionar bilang oficial kan agencia na mayo man nin katutoanan asin an mga surat pigpadara ki Presidente GMA kan Octubre 5, 2001, kabali sa pigpadarahan nin panraraot na surat sinda Senador Joker Arroyo, Sec. Simeon Datumanong, sa Comission on Appointment sa Congreso, COA Regional Director, asin sa DPWH Regional Director, Legaspi City.

        Huli kan mayong pruebang acusacion, segun ki Olfindo siya pigpa-investigaran ni DPWH Usec Sec. Edmundo Mir asin nalinigan man giraray an saiyang pangaran.

        An efecto kaini, afectado si saiyang promotion sagcod na nahali sa saiyang dating destino asin nakabalik man giraray digdi sa Camarines Sur.

        Si Abogado Jose Icaonapo iyo an private prosecutor mientras na sa acusado iyo si Abogado Maximo Banares.