Nag-aandam na nin mahiwas na transport strike sa Bicol na posibleng ilansar sa maabot na Julio 23 asin 24, 2008 nganing makisabayan sa pang-nacion na juelga bilang protesta sa padagos na paglangkaw kan producto nin petrolio cada semana.

        Papangenotan kan Condor Bicol an juelga, alagad an sector nin transporte sa Ciudades kan Naga, Iriga asin sa Camarines Sur mayo pang confirmacion kun sinda masuporta sa gigibohon na protesta.

        An mayor na isyu sa juelga iyo an kahurotan na ibasura na an l2 por cientong EVAT sa producto nin petrolio na iyo an nagpapasakit sa saindang sector mientras na cada semana padagos man an paglangkaw kan precio kan lana asin an pagtunaw na kan oil deregulation law.

        Dai sinda uyon sa on peso sanang dugang na flete sa enot na apat na kilometros mientras na 18ng veces nang naglumpat an precio kan lana.

        Sa ngonian an minimum na flete P8.00 sa jeepney asin ini magiging nang P8.50 mientras 25 centavos para sa masunod na kilometros

        Ipinahayag ni Rafael M. Duque, lider kan sector nin transporte sa Naga asin Camarines Sur na dai man puedi sinda dictahan kan arin mga na grupo ngani sanang magparticipar sa juelga, mayo nin ano man na formal na comunicacion.

        An pinaglalaban digdi para sa gabos, alagad an mahalaga paisihon lamang an natad kan Camarines Sur asin Ciudad nin Naga bakong sinabi ninda ma-juelga masunod na tulos, sabi pa ni Duque.

        Si Duque, chairman kan Federation of Trimobile Operators Drivers Asssociation Cooperative (FETRODACO) kabali sa l6 na organisacion nin mga trimobile sa Naga na nagfirma na sa peticion sa Sanggunian Panlungsod na naghahagad nin dugang na dos pesos na flete sa pasajeros.

        Sa entrevista man ki Jessie Aycardo, federation secretary kan Federation of Trimobile Operators and Drivers in Naga (FETRODINA) sinabi kaini sinda preparado man na magsimpatia, alagad sa pagparticipar dapat magka-igwa sinda nin consultacion mientras na igwa na sindang peticion sa pighahagad na dugang na flete sa trimobile.

        Kun magtugot na an administracion ni GMA sa pagbasura kan EVAT maresulta nin P6.53 na rollback sa precio kan diesel asin P7.56 para sa gasolina.

        An rollback na-ngangahulogan na dagdag na dagdag na ingreso sa mga chofer nin jeepney.

        An report nagpapahayag na kan taon 2006 an gobierno nakatipon nin P49.2 billiones na coleccion sa EVAT asin P54 billiones kan taon 2007, kaya an transport sector tubod na dapat igilid na kan gobierno an pagpatong nin buis sa lana