An local na gobierno kan Pasacao, Camarines Sur asin San Pascual, Masbate padagos na naghahanap nin paagi nganing maconvencir an mga consumedores na magkakan na nin sirang dagat nganing dai ma-afectaran an hanap buhay kan ginatos na parasira sa Ragay Gulf sagcod na ginamit si Bise Presidente Noli de Castro na maglasay nin sira sa presencia kan mga oficiales local, PNP, asin Philippine Army, alagad dai man efectivo mala ngani sagcod sa ngonian maluya pa an vienta huli kan fish scare.

        Si de Castro, liwat nagvisita sa Pasacao asin San Pascual, nganing siya an magpaheling na mayo nang peligro sa salud an pagkakan kan sirang dagat, alagad dai man nahelingan nin efecto kan mga parasira huli apesar na barato na an precio kan saindang pagpabakal kan mga sira gikan sa Ragay Gulf mayo pang parabakal.

        Maging an iba pang parasira sa mga banwaan kan Camarines Sur asin Masbate na sakop kan Ragay Gulf an nagkakagurotom na an saindang familia.

        Dai palang nahahaloy si Director Nestor Santiago kan DOH, Director Dennis del Socorro kan BFAR nagpaheling naman sa publico kan saindang pagkakan nin inasal na sirang dagat, alagad dai pa giraray nabebensir an consumedores.

        Nagbaba nin 60 sagcod sa 70 por ciento an precio kan mga sirang dagat, kulang pa giraray an parabakal sa mga mercado. Huli kaini, kadakli sa sainda dai na muna naglalawog sa dagat ta masasayan sana an saindang mga dakop na sira.

        Mas lalong nagdiklom an paglaom an mga pobreng parasira sa Ragay Gulf kan may masapod naman na 13ng bangkay sa San Pascual, Masbate kan Martes asin 11 sa Camarines Sur asin tulo sa Sorsogon. An dai na mabistong mga bangkay pigkarga na sa M/V Cebu Princess kan Sulpicio Lines.

        An mga nasasapod na mga bangkay sa Bicol gikan sa naglobog na barko kan Sulipicio Lines sa Romblon na may sobra sa 800 na pasajeros.

        Si de Castro kan magvisita sa Masbate asin Camarines Sur nagdistrubuir nin tsikie sa 72 na parasira asin tig-a 5,000 pesos ini kulang na marhay kaya si ibang parasira an naghinanakit logod sa gobierno huli ta pigpili sana si mga benificario.

        Saiyang pigpaliwanag sa publico na libredo sa ano man na contaminacion an pagnamit kan sira na gikan sa Ragay Gulf.

        Si Alcalde Asuncion Villamante Arceno kan LGU Pasacao piglutohan nin masisiram na sira si de Castro arog kan maya-maya, bangkulis asin pusit na naging testigos sa paglasay sinda Undersecretary Celia Yanco kan DSWD, Major General Jeffrey Sudosta kan 9th Infantry Division kan Philippine Army asin Bicol PNP Chief Paterno Bangui.


VP DE CASTRO NAGLASAY SIRA- Pinangenotan ni Bise Presidente Noli de Castro (nasa wala) asin Alcalde Asuncion Villamante Arceņo kan Pasacao, Camarines Sur an paglasay nin sirang dagat na gikan sa Ragay Gulf nganing provaran sa publico na bakong delicado sa salud an pagkakan kaini. Saindang pignamitan an mga sira arog kan maya-maya, bangkulis asin pusit. An bise presidente liwat nagvisita kan Julio 10, 2008, kaibahan niya si Usec Celia Yanco kan DSWD na nagdistrubuir nin mga ayuda sa parasira sa Ragay Gulf asin kabali sa nagkakan kan sirang dagat.

Joma Aguilar