Pamplona, Camarines Sur – Onseng mga pasajero sa duwang nagsalpokan na pampasajerong bus an binawian nin buhay, walo digdi an tulos nagadan sa lugar kan accidente asin tulo sa Bicol Medical Center mientras na 25ng mga iredo an padagos pang naka-confined sa hospital.
An incidente nangyari mga alas 3:00 nin aga kan Martes sa Maharlika Highway sakop kan barangay San Ramon, Pamplona asin an nagsalpokan na bus iyo an executive carrier bus (PWD-356) na haling Manila pasiring sa Ciudad nin Sorsogon asin an silver star bus (TYK-273) haling Tacloban pasiring sa Cubao.
Si Inspector Marianito Almendral, jefe de policia kan Municipal Police Station kan Pamplona, nagsabi na sa saindang investigacion nangyari an incidente kan makoa kan Silver Star an linea kan Executive Carrier mientras na marikas an dalagan kan duwang bus kaya dakul an binawian nin buhay asin mga iredo.
Pig-osipon kan policia na si ibang mga cellphone kan victima an pig-arapodan kan mahal sa buhay kaya ngani naaraman tulos an trajedia.
Pigbisto kan policia an mga victima na tulos binawian nin buhay durante kan banggaan iyo sinda Eric Alcantara y Majello, chofer kan silver star bus na taga Tayabas, Quezon, an mga pasajeros kan bus na ini na sinda Jenny Cartes kan Guadalupe Nuevo, Makati City na bago palang maka-pasar sa nursing board examination, P02 Ricardo Pasaan, Silang, Cavite, Dominador Carion kan Antipolo City asin Godofredo Garcia, mayong address.
An mga pasajeros kan executive carrier bus na binawian nin buhay sinda; Jeorge Evangelio taga Daraga, Albay, Wilson Detadil kan Mabini, Oriental Mindoro asin pigbisto sana sa ngaran na “Bing’, sarong babae.
An chofer kan executive carrier bus, iredo si Melvin Bayobo asin saiyang kaibahan na pigbisto sana sa pangaran na Penilla. Si mga binawian nin buhay sa Bicol Medical Center (BMC), pigbistong sinda; Eduardo Tolentino kan Oas, Albay, Danilo Edloy kan Abugay Leyte asin Dennis Salcedo, mayong address.
Sinabi ni Almendral na si 25ng mga iredong pasajeros an padagos pang naka-confined sa BMC sa Ciudad nin Naga asin posibleng igwa pang iba na pigdalagan sa privadong hospital.
An mga nabistong iredo na yaon pa sa hospital kinababalihan Merian Bartola, Emily Salvador, Michael Salvador, Joel Mallorca, Marilyn Tolentino, Mark Ante, Elvin Bapat, Gloria Antipado, Norcena Mejador, Art Tiocson, Josephine Cedo, Jessie Barnapol, Elizabeth Evangelio, Cristina Ramos, Juanito Metilla, Rolando Llansada, Teofilo Llatera, Elenita Ramos, Rodelyn Fernandez, pigbisto sana sa apeliadong Vivencio, asin duwa pa na sinda Arsensio asin Elvira, kadakli sa sainda mga residentes kan Leyte,Calbayog, Tacloban asin Metro Manila.
Sa record kan manifesto kan executive carrier 29 an saindang pasajeros, alagad an silver star mayong documento.
An mga bangkay nakatiripon sa Funeraria Imperial sa Hernandez Avenue, Ciudad nin Naga. Piglalangkag na kan mga paciente asin familia kan victima an manijamiento kan duwang bus company nganing tabangan an mga victima..
TRAHEDIA SA MAHARLIKA HIGHWAY - Retrato sa itaas an Executive Carrier Bus, haros enterong matuklab si lanub kan bodalan kan marikas na dalagan kan Silver Star Bus (sunod na retrato) sa nangyaring accidente sa barangay San Ramon, Pamplona, Camarines Sur. Retrato sa ibaba saro sa mga bangkay na nakoa sa laog kan Silver Star Bus.
