Nagdecicion na an National Electrification Administration (NEA) na sainda nang i-take over an padagos nang naluluging Camarines Sur Electric Cooperative (Casureco I) Inc., matapos magpalyar an negosacion kan manijamiento na kapotan kan privadong corporacion na Salcon Power Corporation.
Dai nakatabang an resolucion kan junta directiva kan Casureco I. na nag-iindorsar sa NEA na nombrahan na si OIC Josephus Motos na maging permanteng general manager envez dagos nang hinali sagcod na pigdestino si Charito C. Mabitazan bilang Project Supervisor/Acting General Manager.
Si Mabitazan, gikan pa sa central office kan NEA pigtukahan na iyo an magpadalagan kan operacion kan cooperativa sa laog nin 100 dias na kabali sa pigtatrabajo iyo an pagpalangkaw kan collection efficiency asin pagpahuros kan systems loss.
Mismo si NEA Deputy Administrator Pablo Pan iyo an maybitbit sa bagong PS/AGM asin nag-efecto an sanggatos dias niya sa manijamiento kan Junio 2, 2008.
Sa entrevista kan Bicol Mail ki director Erwin Dilanco kan Libmanan District, saro naging dahilan kan NEA na dagos nang i-take over ninda an manijamiento huli ta envez na mapakarhay ni Motos an operacion mas lalong nagka-igwa nin dakulang pagkakalugi.
Sa findings kan NEA management group, ipinahayag na kan panahon ni OIC Motos kan bulan nin Pebrero nagka-igwa nin pagkalugi nin P3,532,795.40 asin kan Marzo nagsakat na an pagkakalugi nin P7,294,936.17. Ini afuera kan nag-aabot sana sa 80 por ciento an collection efficiency asin 26 por cienteng systems loss.
Nakarecibe pa nin peticion an NEA na firmado nin sobra sa sangos na miembros consumedores na naghuhurot na ribayan na an nagtutukaw na OIC asin dapat mag-take over na an sinambit na agencia nganing isalbar sa dakula nang pagkaka-utang sa National Power Corporation.
Sa dahilan na mismanagment an mga Sanggunian Bayan kan Pamplona, Pasacao, Libmanan asin Gainza, nagsuporta na halion na an nagtutukaw na OIC GM. Pigtutukdo na nasa likod kan peticion iyo si dating director Lily Cruz kan Pamplona, Camarines Sur.
Sa siyam na bulan niya bilang OIC nagka-igwa nin 9 milliones pesos na utang sa NAPOCOR, dai pa kabali an dai nababayadan na 300 milliones pesos na restructuring.
Napag-araman sa lado kan dating OIC na antes pang siyang nag-asumir sa puesto haloy nang bangkaruti an manijamiento dai nakakabangon huli kan hababang collection efficiency asin halangkaw na systems loss.
Nadiscobre pa kan NEA na nagka-igwa nin limang taon na contrata sa meter reading, alagad mayo man nin contrata asin ini kan panahon pa ni dating GM Frank Quinones.
An programa kan PS/AGM dapat cada bulan maghuros nin dawa dos por ciento an systems loss cada bulan asin magka-igwa nin estrictong coleccion sagcod na aboton nin 95 por ciento an collection efficiency.
