Ciudad nin Legaspi – An oficina regional kan Land Transporation Office (LTO) sa Bicol estricto nang mapasunod na dapat gabos na vehiculos kan gobierno iparegistro sa saindang agencia nganing maibitaran an pag-imponer nin ano man na multa o penalidad.

        Dakul na mga agencias de gobierno maging LGU an nagluloma na sana, alagad dai completo an mga papeles asin dai registro..

        Si Abogado Ramon S. Roco, Regional Director kan LTO Bicol nagpahayag sa Bicol Mail na mapadara siya nin surat sa mga oficina kan alcalde asin maging ibang agencias de gobierno sa rehiyon Bicol nganing pagirumdumon na kun dai registro an saindang vehiculos pueding i-impound kan mga awtoridad kan saindang oficina.

        Igwang mga ambulancia na pula an placa dai sinda pueding palibrehon na kaipuhan sunodon an reglamento kan saindang agencia, sabi pa kan director.

        Ngonian na balik erescuelahan nakarecibe nin sombong an LTO Bicol na may mga vehiculos na pula an placa, alagad ginigibong service sa paghatud asin sundo kan mga estudiantes sa nagkaperang colegio.

        An RP car gamit sanang pang oficial bako para sa escuelahan, pansaod, bulangan asin iba pang personal na gamit, sabi pa ni Roco.

        Si Assistant Secretary Alberto Suansing kan LTO nagpaluwas nin directiva sa mga LTO regional director na tawan nin importancia na ipagirumdum sa mga oficiales local na “kita an dapat maging ehemplo sa publico na an vehiculo ta dapat naka-registro asin kita an dapat magpaheling nin halimbawa nagsusunod sa ley”, sabi pa sa BM kan director.

        Saiya pang piglinaw na an enforcement kan Acta Republica 1436 maging an department order sa DOTC an LTO iyo an pigtatawan nin awtoridad na magdakop kan mga dai registradong vehiculos.

        Nangapodan pa an director sa PNP na si sainda man na mga vehiculos iparegistro dawa sinda awtoridad magcompleto kan mga pinapasunod kan LTO. An masupog digdi kun si deputized na polis nang-dadakop alagad dai man registrado an saindang mobile car.

        Hahagopon na si may mga ending nin placa na 1, 2, 3, 4, 5 dapat maghidali na huli ta igwa na nin multa asin may patong pa nin penalty mientras na si mga ending 6, 7, 8, 9 0 dapat maghingoha na mag-asekaso kan saindang papeles.

        Mientras tanto, dagos na an pagbalyo kan oficina regional kan LTO Bicol sa Ciudad nin Naga hali sa Ciudad nin Legaspi asin an lugar pueding mamugtak sa Almeda Highway sa Concepcion Grande.

        Pig-aareglar nalang si mga papeles sa donacion kan lote hali sa City Hall.




















Mga loma nang mobile car kan PNP hali sa mga Municipal Police Station kan Camarines Sur na kadakli dai naregistro sa LTO dagos nang pinalapa sa laguerta kan PNP Provincial Office.