Baao, Camarines Sur – An pinaka-premirong petition for recall sa Camarines Sur matapos kan eleccion local kan Mayo 14, 2007, pig-andam na kan nagkaperang oficiales local asin barangay capitan sa banwaan na ini nganing iplantiar sa Commission on Election sa Julio 1, 2008 contra ki Alcalde Quirino Boncayao Jr, huli kan isyu sa loss of confidence.
An campo ni Boncayao nagsabi na pamomolitica sana an mga nasa likod kaini
an dapat tawan nin atencion ngonian iyo an trabajo bilang mga oficiales local halaton na sana an eleccion sa taon 2010.
An grupo naghihiro kadakli mga capitanes de barangay asin iba pang sectores na papangenotan ninda Bise Alcalde Norman Badiola asin dating Alcalde Mel Gaite na iyo an posibleng ilaban sa recall election oras na ma-aprovaran kan Comelec.
Exactong sarong taon sa puesto an alcalde kaya sakop na kan reglamento kan Comelec nganing tugotan an sinambit na peticion. Kabali sa mga lideres kan banwaan na naghihiro sa peticion iyo sinda consejales Jason Bustilla, Mike Bolalin asin Ed Bacsain.
Pigconfirmar ni Gaite sa Bicol Mail kasuodmang hapon sa paagi nin telepono na sa maabot na Sabado (Junio 21) an mga nasa likod kan peticion magkaka-igwa nin miting nganing hamanon an plano na dapat sa laog nin sarong semana matapos an pagpafirma sa mga registradong votantes kan mga barangay.
An banwaan nin Baao may 30ng barangay asin sobra sa 22 mil na registradong votantes susog sa record kan Comelec asin kun sa 20 por ciento an magfirma na iyo an rekisitos sa reglamento kan Comelec ini kayang-kaya, sabi pa kan dating alcalde.
Kawaran nin pagtitiwala an reclamo contra sa alcalde asin an mga isyu kinababalihan nin mga pamomolitica contra sa mga oficiales de barangay sagcod sa mga pang-iipit sa proyecto na dai kaalyado na an afectado an residentes kan barangay.
Kabali sa mga isyu iyo pagdistribuir kan Philhealth cards na pili sana sa mga kaalyado kan alcalde, si mga dai kaalyadong capitanes de barangay dai natatawan nin recomendacion sa pagrasyon kan NFA rice, paghali kan municipal budget officer na si Aires Barairo, inapon sa Capitolio Provincial na an sueldo gikan man giraray sa caha kan municipio, siya pigribayan nin OIC na sarong architect gikan sa Municipal Planing Office na daing pagkasabot sa paghaman nin mga prosupuesto sa barangay kaya na-aabala an barangay budget.
An isyung ini pighahalat an kasimbagan kan jefe ejecutivo local, alagad sinda discuntento kaya pabor na sa petition for recall.
Pigbuyagyag pa kan dating alcalde na sa 30ng capitanes de barangay an 13 kaini mga kaalyo ni Boncayao kaya si l7 o mayoria an afectado kaya bilog na an suporta laban sa jefe ejecutivo local.
Sa mga enot na entrevista sa alcalde saiyang pig-aacusaran na amay na namomolitica iyo si Badiola mala ngani si saiyang pigsumiter na executive budget pigpara-ulang sagcod na ginibong 30 mil pesos na sana si intelligence fund kan oficina kan jefe ejecutivo local.
Mientras tanto, piglinaw ni Badiola na mayo siyang plano na magcandidatong alcalde kun madagos an recall election, alagad si Gaite nagsabi na kun an namamanuan siya an pigtutulod na magcandidato iyan andam niyang akoon orog na kun mangyari na sobra sa 20 por ciento an nakafirma sa peticion.
