Kulog payo asin kasusopgan an inaatubang kan sarong topnotcher municipal kagawad kan Sanggunian Bayan kan Bato, Camarines Sur matapos mag-reclamo an saiyang l6 anyos na katabang sa harong na inabuso soboot nin limang veces.

        An suspechadong Kagawad pigbisto kan mga awtoridad na si Engr. Diosdado Zorilla, 46 anyos, may agom asin topnotcher councilor sa ginibong eleccion local kan Mayo 2007.

        An victima na si Maria, bakong tunay na pangaran naghagad nin tabang sa National Bureau of Investigation (NBI) Bicol asin sa investigacion ipinahayag na positivo na inabuso an menor de edad.

        Pigrecomendar na kan NBI sa Provincial Prosecution Office kan Camarines Sur an pagsangat nin casong panlulupig sa municipal kagawad sa pagbalga kan Acta Republica 7610 o mas bestado sa apod na Special Law for the Protection of Children Against Abuse.

        An reclamo narecibe na kan oficina ni Provincial Prosecutor Agapito Rosales kan Junio 23, 2008 asin sa dai mahahaloy poponan na an preliminary investigation kan saiyang oficina nganing determinaran kun igwang prima facie case.

        Sa investigacion kan NBI ipinahayag na limang veces inabuso an katabang sa harong sa mga magkasuhay na bulan asin petsa asin ini nangyari enot kan Abril 5, 2008, Abril 16, 2008, Mayo 10, 2008, Mayo 21, 2008 asin Mayo 31, 2008.

        An victima enot naglaog sa trabajo kan Deciembre 25, 2006 bilang sarong waitress sa canteen kan kagawad sa barangay San Miguel kan kaparejong banwaan na nag-eedad pa sana nin katorce anyos alagad an ginibong pang-aabuso nangyari na ngonian na taon na nasa edad na nin l6 anyos.

         Sa lado kan suspechado, pigprovaran na koanan nin paliwanag kan miembros kan media alagad maolyas mag-atubang sa interview.

        An incidente enot na pigpa-abot an sombong sa Municipal Police Station kan Bato, Camarines Sur an awtoridad digdi nagsayuma na ipaluwas sa media an pangaran kan suspechado sagcod na naghagad nin tabang an magurang ki Alcalde Janette Bernaldez.

        Nasa custodia na kan Muncipal Social Welfare Development Office an victima mientras na naghahalat kan justicia.

        An sinambit na caso aram na kan mga miembros kan Sanggunian Bayan asin nagsayuma nang magcomentario mientras na pigsangat na an caso criminal sa procujurador.