Nagkukulang na an supply kan NFA rice na pigdidistribuer sa mga awtorisadong NFA rice retailers sa 35 banwaan asin Ciudades kan Naga asin Iriga kan Camarines Sur huli ta kulang na an stock nin bagas sa bodega kan NFA sa barangay Palestina, Pili, Cam. Sur.
Nagkapera nang mga oportunista asin madayan NFA rice retailers an nagkadarakop kan Palengke Watch kan NFA asin temporariong pigcancelar an saindang licencia mientras na pighahagadan nin paliwanag. Kadakli sa mga nadakop overpricing kan pinapabakal na bagas kan NFA.
Kun igwa pang alocacion sa mga NFA rice reatailers alagad iyan limitado na mala ngani an pagpabakal nin bagas nalawig na sana nin saro sagcod sa duwang oras pakatapos kaini sarado na sa pagpabakal kan NFA rice.
Kaipuhan may 90,000 na sakong stock nin NFA rice bilang food security sa Camarines Sur sa ngonian segun sa mga pahayag ni Provincial Manager Jose Danilo Nieves igwa na sanang 24,000 para sa l6 dias. Alagad saiyang piglinaw na igwa pa sindang pighahalat na alocacion hali sa bodega kan NFA regional office sa Ciudad nin Legaspi.
Dakula an posibilidad na maghuros sa 40 por ciento an supply nin bagas sa Camarines Sur huli ta dakul an nanganga-ipong consumedores kan NFA rice na an precio P18.25 cada kilo mientras na sa commercial nagparamahal nag-aabot na sa P25.00 asta sa P33.00.
Sa Ciudad nin Naga si alcalde Jessie M. Robredo pamayo kan price monitoring council pigsugo si Consejal Maria Elizabeth “Babeth” Lavadia, chairman kan committee on consumers protection kan Sanggunian Panlungsod na mag-monitor kan precio kan NFA rice asin commercial rice.
Sa entrevista kan Bicol Mail ki Lavadia saiyang pigconfirmar na nagwawara-wara an NFA rice sa mercado publico mientras na si walong NFA rice retailers digdi piglimitaran si alocacion kan bagas.
Mantenido sa Pl8.25 an cada kilo, alagad an pagpabakal may oras sana poon alas 8:30 asta alas l0:00 nin aga. Sa commercial rice nagpapako sa 25 asta sa 33 pesos cada kilo.
An grupo ni Lavadia sa paglibot sa tiendahan nin mga bagas kinababalihan kan representante kan DTI, asin assistant market supt. Frederic Arias.
NFA NAGSEGURO NIN REGULAR NA SUPPLY NIN BAGAS
Pigpahayag ni Nieves na si mga NFA retailers igwang alocacion na bagas alagad limitado. An reclamo na dai man nahehelingan an ibang retailers na nagpapabakal kan NFA rice envez pigdududahan na pighahalo sa commercial rice. An sombong pig-iinvestigaran na kan saindang oficina.
10ng MADAYANG NFA RICE RETAILERS NADAKOP
Pigpaluwas na an mga pangaran kan nagkadarakop kan grupo kan Palengke Watch na kinababalihan ninda Elizabeth Bare kan San Jose, Milaor, sa casong overpricing; Antonia Ani kan Dinaga, Canaman, sa casong pagsayumang magpabakal kan NFA rice; Alberto Madrigal kan Ragay, sa dai pag-display kan NFA rice; Ramon Bacudio sa mercado kan banwaan nin Ragay – overpricing na P25.00 cada kilo; Rosa Acenita kan Gaongan, Sipocot – overpricing P19.00 cada kilo; Jaime Azuero kan Tara, Sipocot – overpricing na P19.00 cada kilo; Maribel Llorente kan San Juan, Sipocot – overpricing sa Pl9.00 cada kilo; Aida Garcia kan Tara, Sipocot – sa reclamong “diversion of NFA rice”; Manual Pasa kan Lagonoy – mayong signboard na NFA retailers; asin pignaranan sanang Bolalin kan Agdangan.
An sinambit na nagkadarakop temporariong pigcancelar an saindang licencia mientras na pigpapadagos pa an investigacion.
Caption: Retrato sa itaas parejas na sana kalangkaw nin tao an pakaka-mada kan stock nin NFA rice sa bodega kaini sa Pili, Cam. Sur kun icocomparar kan panahon ni dating provincial manager Edmundo Enrique na doble pa kalangkaw nin tao an nakatambak na sinakong bagas.
Retrato sa ibaba si ginibong inspection ni Consejal Ma. Elizabeth Lavadia (sa wala) kan Consumers Protection Committee kan Sanggunian Panlungsod asin kan DTI na pig-representar ni Ms. Maylene Caning, Sr. Trade Industry Dev’t. Specialist (mayo sa retrato) sa mercado publico na mayo nang laog an kahon kan saro sa walong tiendahan kan NFA rice huli ta limitado na an supply kan bagas.
