Si P/Sr. Supt. Edwin Jose Nemenzo iyo na an pig-indorsar kan Sanggunian Panlungsod kan Ciudad nin Naga ki Alcalde Jesse M. Robredo na maging full-fledged na City Director (CD) kan Naga City Police Office (NCPO), alagad naka-atubang nin amay na pagtuyaw asin angat sa saiyang kakayahan sa campania contra sa ilegal na sugal na jueteng.

        An jefe ejecutivo local padagos an panindugan contra sa ilegal na sugal na jueteng alagad an pig-indorsar kan Sanggunian Panlungsod na maging permanteng City Director nag-ako na ginagabatan na mapuho an operacion kan jueteng sa Naga.

        Si Robredo pighahalat kan SP kun saiyang papaboran na maging full-fledged na City Director asin piglalaoman na ma-anunciar na kan saiyang decicion.

        Siya na an pigsuportaran kan consejo sa paagi kan resolucion na pigpadrenohan ni Consejal Jose Tuason matapos magpalyar na mag-atendir sa regular session kan Sanggunian Panlungsod sa duwang veces na invitacion an apat pang nominees na oficial kan PNP na hali pa sa Camp Crame na pigsumiter sa oficina ni Robredo ni OIC Regional Director Roberto Bondoc kan Bicol PNP.

        Naging cuestionable an kakayahan ni Nemenzo laban sa jueteng huli ta nagpalso an saiyang pangako sa City Hall na sa laog nin 24 oras kaya niyang mapapundo an operacion kan jueteng.

        Kan perang aldaw palang siya sa NCPO mayo pang bola kan sugal na jueteng sa saiyang area of responsibility kun igwa man iyan collection sana, alagad envez na mapundo nagka-igwa lugod kan bola aro-aldaw na ginigibo sa barangay Pacol, Ciudad nin Naga.

        Sinudya siya ni bise Alcalde Gabriel H. Bordado Jr. kun ano si nangyari kan pangako niyang 24 oras laban sa jueteng an nangyari inako na sana sa SP na nasasakitan siya sa pagpuho kan ilegal na sugal.

        Pinatanidan siya kan bise alcalde na pundohon an sugal maging an collection asin magconcentrar sa iba pang campania sa criminalidad orog na sa mga street crimes.

        Si Tuason, dating jefe de policia kan Naga PNP antes naging miembro kan SP kan maka-olay kan Bicol Mail sinabi kaini na kun decidido an sarong pamayo kan policia na pundohon an sugal iyan pueding mangyari.

        Nag-asegurar si Nemenzo na an saiyang plano laban sa criminalidad loway-loway na ma-iimplementar sa laog nin anom na bulan kaayon na an implementacion kan mga ordenanza kan City Hall.

        Nagtutukaw palang siyang OIC City Director, padagos na naglalangkaw na caso iyo an mga snatching asin harabonan na iyo an saiyang kabali sa prioridad na kaipuhan an dugang na police visibility sa centro kan ciudad mientras na 90 por ciento kan mga criminalidad nangyayari sa central business district I.