Nakatalaan na magvisita sa Camarines Sur sa Marzo 30, 31, 2008 si dating Presidente Joseph Estrada nganing maaraman an pulso kan publico sa posibleng pag-candidato niya liwat sa 20l0 presidential election. Enot nang pigconfirmar niya sa media sa Manila na dai niya hinahali an plano na liwat na magcandidato sa maabot na eleccion kaya ngani nagpapadagos an saiyang paglibot.
Makikipag-hampangan siya sa mga lideres kan oposicion kabali si Congresista Arnulfo Fuentebella kan tercer distrito kan Camarines Sur, dating Presidential Assistant for Bicol Affairs Anton Dy-Prieto asin iba pang mga lideres na nagsuporta sa saiya kan siya magcandidatong presidente para magconsulta sa plano na magtapsok giraray sa politica.
Duwang aldaw siya sa Camarines Sur asin an saro sa ocacion na saiyang aatendiran sa Marzo 30 iyo an graduation ceremonies kan Partido State University (PSU) na siya an magiging juespe de honor.
An PSU na namumugtak sa Goa, Camarines Sur na-crear bilang State University susog sa Acta Republica 9029 na pig-padrenohan ni Fuentebella asin siya pa kaidto an House Speaker mientras na yaon pa sa puesto si Estrada.
An dating presidente ma-visita pa sa Ciudades kan Naga asin Iriga mientras na sa Marzo 30ng banggui maturog sa sarong hotel sa Naga. Afuera pa kaini posibleng mag-motorcade sa centro kan ciudad asin sa pagtaraid na municipios.
Papangenotan ni dating Speaker Fuentebella an pagsabat ki Estrada sa Naga Airport sa Pili, Camarines Sur.
Sa halipot na panahon kan dating presidente sa Malacanang dakul na proyecto an nadara sa Partido area mientras na an congresista digdi nasa puesto pa bilang House Speaker.
Napag-araman na plano pa kan dating presidente na maglibot pa sa ibang provincias kan kabikolan kabali an Masbate na kun haen gana siya digdi sa presidential election.
Alagad an campo ni Erap nagsayuma pang confirmaron kun nuarin liwat malibot sa Bicol huli ta pig-aandam pa an planong pagbalik digdi sa rehiyon.
Siya naglibot na sa ibang rehiyon parte kan ginigibong consultacion sa pagbalik liwat sa politica na dawa na ngani enot na niyang pig-nigaran, alagad sa ngonian inako na dai mahahali an ambicion na magbuelta siya sa presidential election.
