Ragay, Camarines Sur –- Dawa semana santa iginilid kan tropa kan militar asin rebeldeng NPA an panahon na ini sa pagsakit ni Jesucristo nagpadagos an saindang operacion kan Miercules santo sagcod na nagka-igwa nin encuentro saro an gadan sa militar asin saro man sa NPA.

        An encuentro nangyari sa barangay Palalonan, Ragay mientras na nagcoconducir nin pag-patrolia an maabot sa l5ng soldados kan 9th scout ranger saindang nasagopa an pigkakarkulong 30ng miembros kan rebeldeng NPA asin digdi nagka-igwa nin masarong oras na pabalyohan nin putok an mag-ibong na grupo.

        Matapos na magtiribwasan an grupo kan rebelde saro sa sainda an natumba na dagos nang binawian nin buhay kan tamaan nin bala kan M-16 armalite hali sa soldados kan gobierno asin saro man sa grupo kan militar na pigbistong si Pfc Agosto Afalia mientras na dai mabisto an bangkay kan NPA.

        An sinambit na barangay pigcoconsiderar kan Philippine Army na influence barangay kan kumunista kaya an operacion militar magpapadagos laban sa insurgencia.

        An report kan campo militar nakasamsam sinda nin sarong M-16 armalite, mga bala, apat na granada asin mga subersivong documentos.

        An incidente nangyari kan an nagkaperang mga residentes magsombong na may armadong grupo sagcod na naglansar nin patrolia an soldados kan gobierno asin saindang inabotan an mga NPA na digdi na sinda nagka-igwa nin ralaban.

        Dawa taposon na an encuentro na duwa an mga binawian nin buhay an 9th scout ranger nagpadagos kan saindang operacion sa mga nagdudulag na kalaban kan gobierno.