Mamundo an kasugoan kan Arzobispo kan Caceres sa Ciudad nin Naga na bawalaan an mga kapadian digdi na magconducir nin misa sa rally ni star witness Rodolfo Lozada Jr. alagad iyan an decicion kan simbahan kinakaipuhan irespeto, sabi sa mga pahayag sa Bicol Mail ni alcalde Jejomar Binay.
Si Binay naconducir nin entrevista kan BM kan magvisita sa Ciudad nin Naga kasuodma antes nag-pasiring sa Calabanga asin Pili, Camarines Sur para sa sisterhood agreement kan sinambit na mga LGU.
“Malungkot yun decisyon pero yun an decisyon nila respetohon natin”, sabi kan alcalde kan Makati na pamayo kan United Oposition (UNO).
Si Lozada nakatalaan kuta na mag-visita sa Ciudad nin Naga kan Marzo 24, 2008 para sa pigtalaan na rally asin “mass for truth”, alagad antes pa siyang magpasiring kuta sa Naga na nacancelar nagpaluwas nin kasugoan an simbahan na dai mag-misa an kapadian sa ano man na political rallies.
Dinagdag kan alcalde kan Ciudad nin Makati, na dapat helingon man na kun nagpapa-misa ngani sa Malacañang naghahakot pa nin maatendir sa misa kinokoanan pa nin retrato si PGMA mientras na nakaluhod. An misa afuera kan mga hinakot kun siisay isay na mga personalidad sa katuyohan na labanan an pangapodan na Gloria Resign, ini malinaw na may katuyohan political kaya dapat “pantay-pantay lang” sabi pa kan alcalde. Dai siya contra sa mga ginigibong regular na misa envez an katuyohan contra sa movimiento sa pagpa-demiter sa saiya sarong pampolitical pa ini.
An sinambit na isyu enot naman piglinaw kan Caceres sa paagi kan mga pahayag sa BM ni Fr. Louie Occiano na an orden ni Arzobispo Leonardo Z. Legaspi bako sanang para ki Jun Lozada envez maging sa ano man na political rallies kan maka-administracion.
Sarong “reminder lang” kan Arzobispo kan Caceres an orden huli ta an misa sarong sagradong bagay na dai dapat gamiton pampolitica na magiging dahilan sana nin pagkakabaranga kan tao sa mga bubutasan na pahayag political, sabi pa ni Occiano.
An lider kan oposicion afuera kan pig-atendiran na sisterhood city naghapit pa sa mga banwaan kan San Fernando asin Magarao, parejo kan Camarines Sur.
Siya napa-bareta na planong magcandidato sa presidential election sa May 20l0 alagad nagsayumang magconfirmar huli ta harayo pa an tiempo politica.
Caption: LIDER KAN OPOSICION NAGLILIBOT SA CSUR. - Si Alcalde Jejomar Binay kan Ciudad nin Makati (nasa wala) kahampang sinda Alcalde Fermin Mabulo (sa tahaw) kan San Fernando, Cam. Sur asin dating Congresista asin presidente nacional kan Aksyon Democratico Sulpicio Roco Jr. Si Binay pamayo kan United Oposition naglibot sa nagkaperang municipio kan Camarines Sur afuera kan pig-atendiran niyang programa sa sisterhood agreement entre kan Makati asin mga LGU kan Calabanga asin Pili.
