Si Fidel “Totoy” Cu kan Ciudad nin Naga na sarong negociante pig-nombrahan ni Presidente Gloria Macapagal-Arroyo bilang miembro kan Board of Director kan Philippine Crop Insurance Corporation (PCIC) na mina-representar kan Private Insurance Industry karibay ni Jefrey Martinez.
An nombramiento firmado ni Presidente Arroyo kan Pebrero 28, 2008 asin pinasumpa na siya sa puesto ni Department of Agriculture Secretary Arthur Yap sa ginibong ocacion kan Farmer’s Day kan Lunes sa Libmanan, Camarines Sur
Sa entrevista kan BM sinabi ni Cu bilang sarong Bicolano digdi poponan na ma-pakarhay an ngaran na pagpaseguro kan lado nin agricultura mientras na matalaan sinda nin miting ki DA Regional Director Jose Dayao.
Ipinahayag man ni director Dayao na an pagkaka-nombra sa negociante asin sarong bangkero sarong “welcome development’ huli ta siya Bicolano na mina-representar kan private sector mientras na ciertong enot na matatabangan niya iyo an Bicol na aram niya an problema kan rehiyon.
An PCIC garong turog na agencia de gobierno na daing gayo natatawan nin atencion an ngaran na marketing strategy nganing macombensir an sector nin paraoma na ilaog sa seguro an saindang mga tinanum na paroy maging sa livestock ta kun igwang nangyayaring calamidad pueding makabangon tulos an paraoma, sabi pa ni Dayao.
Nangyari na si mga sunod-sunod na calamidad sa Bicol dakul si nadestrosong kaparoyan mala ngani si tubig baha sana kan mga nakaaging semana maabot sa P500 milliones, kun sinda nagpa-seguro sa PCIC maibabalik si gastos sa oma asin makakatanum tulos.
Sinabi ni Cu na an PCIC bilang refinancing program kun na-afectaran an paraoma an saindang mga tinanum huli kan calamidad mababayadan sinda kan destroso na igwa nang magagamit na cuarta nganing makatanom tulos na dai masasayang an panahon.
An sinambit na agencia napapayongan kan DA alagad an record nagluluwas na kulang an naglalaog sa seguro sa PCIC huli ta dagdag na gastos kan mga paraoma. Ngonian sainda nang narealisar an dakulang pagkalugi na pueding makatabang an PCIC, segun pa sa pamayo kan DA Bicol.
