PIGHAHAGAD na ngonian ni Alcalde Jesse M. Robredo ki Police Director General Avelino Razon Jr. jefe kan Philippine National Police, an pagnombra ki P/Sr. Supt. Edwin Jose Garcia Nemenzo bilang full fledge chief of police kan Naga City PNP.

        Sa saiyang surat sa Camp Crame, sinabi ni Robredo ki Razon na magkakanigong itao ki Nemenzo ang posisyon na hefe kan policia pagkatapos na maipaheling kaini na epektibo an campania kan lokal na policia laban sa criminalidad. Base sa records kan policia, nagbaba an insidente nin krimen sa lindong kan turno ni Nemenzo, an namamayo kan policia ngonian bilang officer-in-charge.

        Sinabi pa sa surat ni Robredo na igwang fetchang Mayo 2, ngonian na taon na naging marhay pang namomoon si Nemenzo sa mga personajes kan policia sa ngaran nin pagdisiplina asin pagpasakat kan morale kan saiyang mga pagiriba.

        Segun ki Robredo, an mga ginigibong ini kan officer-in-charge rason tanganing magbuwelta an tiwala asin confianza kan mga constituentes sa PNP, maging marhay an paz y orden asin relacion sa tahaw kan policia asin mga residentes.

        Sa kaparehong surat, ipinahayag ni Alcalde Robredo an saiyang kamunduan sa ibang opisyales na pigrerekomendar kan provincial police office na dae nagsusunod sa proseso kan ciudad sa pagpili nin magiging hefe kan PNP sa Naga huli ta dai sinda minaabot sa ipinagtalaan na aldaw kan saindang pagatubang sa peace and order council kan tanganing ipresentar an saindang mga sadiri asin an saindang mga plano en casong maging jefe kan policia.

        Resulta kaini, segun sa alcalde, dai nagkaigwa nin pagkakataon an ciudad na dangogon an apat sa limang candidato, solamente si Nemenzo sana an nagabot asin nagpresentar kan saiyang mga plano. Causa kaini an pagkakaatraso kan lokal na gobyerno tanganing makapagdesicion kun siisay an pipilion sa mga rekomendado.

        Sinabi pa ni Robredo na huli kan pag endorsar kan provincial police office nin mga candidatos na takot isumitir an saindang sadiri asin an saindang mga plano sa mga oficiales kan ciudad, napapasipara kan provincial director an importancia asin kahagadan kan RA 6975 na nagtatao sa alcalde nin poder na pillion an pinakamarhay na candidato sa pagka jefe kan policia.

        Mientras tanto, apesar kan angat kan mga oficiales local na dapat ipaontok kan jefe kan Naga PNP an ilegal na sugal na jueteng alagad sagcod sana sa pangako ni Nemenzo na sa laog nin 24 oras kayang ipapundo an ilegal na sugal sa saiyang area of responsibility. (JBN)