Pili, Camarines Sur -– An piglalangkag kan mga LGUs na kakulangan nindang dapat macobrang internal revenue allotment (IRA) para sa taon 2001, asta 2004 sa dai mahahaloy ini sainda nang marerecibi gikan sa Department of Budget and Management (DBM).
Si Gobernador L-Ray Villafuerte kan Camarines Sur asin pamayo nacional kan League of Provinces of the Philippines (LPP) nagconfirmar na kaini sa mga oficiales local kan provincia matapos makipag-hampangan sa Liga si Presidente Gloria Macapagal-Arroyo na nag-informar na preparado na an P12 billiones na IRA para sa mga LGUs na dai naitao kan mga taon 2001, 2002, 2003 asin 2004 huli ta re-enacted si prosupuesto nacional kan magpalyar na dai maaprovaran kan Congreso.
An gobierno provincial kan Camarines Sur igwa pang cobrahon na 40 asta 50 milliones pesos mientras na sa mga municipio mag-dedefende kan saindang categoria.
An fondo dakulang bagay sa ano man na proyecto na iimplementar kan Capitolio Provincial maging kan mga LGUs kabali na an para sa basic services sa constituentes kan barangay.
Sa Camaligan, Camarines Sur, sinabi ni Alcalde Rolando Eduardo na kun sainda nang marecibe an piglalangkag na IRA kabali sa makiki-nabang iyo an mga empleado kan municipio sa pag-implementar kan diez por cientong dugang na sueldo na ma-efecto sa Julio ngonian na taon.
Napag-araman na an ibang mga LGU naglalaom kan dugang na IRA mientras na saindang ipapasunod an diez por cientong salary increase sa bulan nin Julio 2008.
An saindang dahilan na halaton an IRA huli ta sa saindang aprovadong 2008 annual budget dai kabali an dugang na sueldo sa saindang mga empleados.
An DBM igwa nang pinaluwas na memorandum circular sa pag-implementar kan dugang na sueldo.
An LPP dai nadificilan na hagadon ki Presidente Arroyo an dugang na IRA huli ta kan panahon kan controvercial na isyu sa ZTE deal sa mga pagbuyagyag ni Jun Losada sa senate inquiry kan suroholan sa sinambit na transaccion sagcod na pighuhurot na magtagbang sa puesto sa Malacanang si GMA, an Liga nagpasar nin resolucion na saindang pusog na pigsusuportaran si GMA mientras dai man nakaka-presentar nin documentadong evidencia si Lozada.
An resolucion pinasar sa general assembly kan LPP kan Pebrero 13, 2008 na ginibo sa Villa del Rey, Capitol Complex. Cadlan Pili, Camarines Sur. Naging juespe de honor sa sinambit na asemblia iyo mismo si Presidente Arroyo.
