Ciudad nin Iriga – An Camarines Sur III Electric Cooperative (Casureco III) Inc. pinapadalagan na nin duwang managers matapos sana kan pinakahuring district election sa mga miembros kan junta directiva kan Mayo 24, 2008.
Sinda General Manager Pedro Pestrado asin si OIC General Manager Joel Sergio iyo ngonian an nagpapadalagan kan cooperatva, alagad an casong ini dai man nakatabang sa manijamiento envez controvercia kun siisay an dapat reconosiron kan mga empleados.
Nangyari an pagka-igwa nin duwang managers kan magpasar an nin resolucion kan Mayo 26, 2008 an junta directiva sa pamamayo ni Board President Ronald Felix Alfelor na nagsususpendi ki GM Prestado asin pigdesignar si Sergio bilang OIC GM.
Alagad si Prestado nagsayumang reconosiron an resolucion kan junta directiva envez nagpahayag sa prensa na siya magpapadagos sa puesto huli ta cuestionable an accion contra sa saiya.
Sinabi kan GM na an bagong miembros kan junta directiva na nang-gana pa sana sa natatapos palang na mga district election kan Abril asin Mayo 2008 dawa na ngani nagsumpa na sa puesto, alagad dai pa sinda dapat mag-asumir sa puesto huli ta kinakaipuhan pang mag-agi sa cooperative management seminar na pigmamando susog sa resolucion No. 2, serye kan 2003 kan ERC.
Dai pa sinda qualified de facto pa sinda kinakaipuhan mag-agi muna sa seminar base sa pigmamando sa resolucion kan ERC, sabi pa ni Prestado.
An Casureco III may siyam na miembros kan junta directiva asin an anom kaini si bagong na-elihir na mga director, alagad pig-aacusaran kan sinuspending GM na taohan ni Congresista Felix Alfelor Jr. asin may motivo political an lakdang contra sa saiya.
Huli kaini, mayoria sa mga miembros bestadong kaalyado kan poderosong politico sa Rinconada area mientras na an board president na si Ronald Felix Alfelor, tugang ni Alcaldesa Madel Alfelor Gazmen.
An rasones man kan grupo kan board president na si Prestado nag-aatubang nin caso administrativo na pendiente sa National Electrification Administration kaya dapat magpasa-irarum siya sa preventive suspension.
Napag-araman sa pag-apod sa telepono kan Bicol Mail kasuodmang hapon sa oficina kan Casureco III na an ginibo muna kan GM nag-vacacion sa oficina asin an walat na mensaje na siya pa an general manager.
Si Sergio, padagos naman na nagfufuncionar an saiyang trabajo bilang OIC GM alagad ini pigcucuestion ni Prestado.
Pig-acusar kan sinuspending GM na an mga Alfelor may dakulang morosidad sa electric bill maging an City Hall dai nakakabayad kan saindang obligacion sa cooperativa kaya mawot nindang ma-controlan an manijamiento.
Sa lado ni Congresista Alfelor saiyang pinapahimotikan an sahot kan suspendidong GM huli ta mga empleados man sana an nag-sangat nin caso sa saiya na pendiente sa NEA. Nagtutubod an diputado na mis-management an pagpadalagan kan cooperativa mala ngani dai nakakabayad kan mga morosidad sa Napocor.
Mientras tanto, si dating board president Domingo Yu kan Casureco II nagpahayag na dai naman kaipuhan an pigsasabing rekisitos na mag-seminar an mga director nganing macalificar sa pag-asumir sa puesto.
Segun saiya haloy na siya naging director sa Casureco II dai na ngani siya naka-atendir sa pig-oobligar na seminar huli ta gastos sana ini kan manijamiento, alagad reconosido siya bilang miembro kan junta.
