Nag-aandam na nin protest rally an mga empleados kan gobierno sa Ciudad nin Naga asin Camarines Sur contra sa Government Service Insurance System (GSIS) nganing idenuncia an liderato ni Presidente Winston Garcia sa risado nang pang-aabala kan pagpalowas kan mga benificios nin mga empleado huli ta ginamit kan administracion an fondo kan agencia.
An hiro protesta paparticiparan kan mga empleado gikan sa Department of Education, empleados kan Hall of Justice na hali sa RTC asin MTC, Prosecution Office, Department of Environment and Natural Resources, City Hall na compuesto kan grupo kan Naga City Hall Employees Association asin iba pang agencias de gobierno.
Si Pelagio Papa, Jr. lider kan convenor group nagsabi sa Bicol Mail na oras na preparado na an planong protesta ano man na aldaw saindang ilalansar an accion asin an saindang tiripon gigibohon sa Plaza Quezon sagcod na magkaka-ihwa nin marcha pasiring sa sanga kan GSIS sa barangay Del Rosario sagcod na saindang susulon an epigy ni Garcia bilang pagpasabot kan saindang sentimiento.
Hinahagad ninda na magka-igwa nin updated posting kan remittance, na sa ngonian afectado an rinibong empleados kan govierno ta dai areglado an mga record na ini an nagiging dahilan na dai sinda maka-aprovetsar kan salary loan asin policy loan.
An cuarta kan mga miembros kan GSIS ginagamit sana kan administracion sagcod na pig-invest ni Garcia sa ibang nacion huli kaini nagtutubod an mga empleados na tuyong inaabala an proceso kan papeles nganing dai macobra an saindang benificios sa paagi kan salary asin policy loan.
Sa regular session kan Sanggunia Panlungsod kan Ciudad nin Naga kan Martes naging visita an GSIS Naga Branch na pigrepresentaran ni Resurreccion Bulaong, loan division chief asin haros pigsurorogan siya nin kahapotan sa kapalpakan kan manijamiento na afectado na an benificios kan mga empleados.
Kabali sa victima kan GSIS iyo si Rodrigo Belleza, anom nang bulan nag-retiro sa service bilang tesurero kan City Hall kan Ciudad nin Naga alagad sagcod sa ngonian dai pa nakakarecibe kan mga biyaya.
Si Belleza nagpasurog na sa Sangguniang Panlungsod kan Ciudad nin Naga nganing hagadan nin paliwanag.
Sinabi ni Bulaong na an ginigibong solucion kan saindang agencia iyo an “massive posting project” na piglalaom ma-cocompleto sa Noviembre 30, 2008.
Si Papa, saiyang pigpaabot an reclamo kan mga court employees na haloy nang nagsumiter kan saindang mga papeles sa salary asin policy loan, alagad pigpaparatogaan sana.
Nag-atubang man si Marilou Palmaria, bise presidente kan employees association kan City Hall na saindang natuyawan an permi nalang na dahilan kan pag-proceso kan saindang papeles na aabala sa posting mala ngani inaabot na nin limang bulan dai pa giraray na-aaprovaran an saindang mga loan application.
“Pig-gagadan an oras para dai maka-loan an empleados’, sabi sa tuyaw na pigpaabot mismo sa representante kan GSIS sa atubangan kan mga miembros kan Sanggunian Panlungsod. Alagad ini pigpahimotikan kan oficial kan sinambit na agencia de seguro.
An GSIS saindang pig-oorgullo an high tech na mga sa oficina nganing maparikas an transaccion arog kan electronic remittance alagad kabaliktaran ini kan mga nakaaging panahon mano-mano sana an gamit, pagka-hapon puedi nang makoa an tsikie, sabi man sa tuyaw ni Bise Alcalde Gabby Bordado.
Bako lang an mga empleado an nagrereclamo maging an pensionado na pinapadificil sa pagcobra kan biyaya pati na si nagretiro na sa servicio sa gobierno.
