Maatubang na nin magabat na castigo an mga oficiales kan cooperativa nin corriente sa nacion na pueding magsapo nin pagkakalaom sa carcel asin multa kun padagos na magsisinutil na dai magpa-registro sa Cooperative Development Authority (CDA) apesar na ginagamit ninda an ngaran na “cooperative”, ini oras na ma-aprovaran na an propuestong ley sa Congreso na nag-eenmienda kan Cooperative Code of the Philippines.

        Pusog na pig-iindorsar sa Congreso kan Philippine Cooperatives Center (PCC) an pag-enmienda kan provicion sa codego mala ngani nagtalaan na kan Bicameral Conference Committee sa maabot na Noiviembre 11, 12, 2008.

        Suportado na ini kan duwang Camara nganing mapersigir an mga cooperativa nin corriente sa nacion na magpa-registro sa CDA, sabi ni Felix A. Borja, chairman kan PCC asin Secretary General kan Cooperatives Union of the Philippines.

        Si Borja nag-atubang sa press conference mientras na nag-aandam na an saindang grupo sa 9th National Cooperative Summit na nag-poon na kasuodma an mga programa sa Convention Center kan Capitolio Provincial sa Pili, Camarines Sur. Nagsikad an actividades kan Octubre 22 asta 25 asin igwa nin ibang mga programa na ginigibo sa Plaza Quezon kan Ciudad nin Naga.

        An mga cooperativa nin corriente langtadan na nagdedeclara na dai sinda mapa-registro sa CDA asin kinakaipuhan na digdi an ngipon, sabi pa ni Borja.

        Sa ngonian sa l19ng cooperativa nin corriente an 74 kaini registrado sa CDA bilang stock cooperativa asin nakikinabang na an mga miembros consumedores.

        Saro sa na notaran kan PCC nganing dai maka-registro nagpaluwas nin guidelines an National Electrification Administration na dapat paagihon sa general membership meeting an ano man na propuesto sa pag-converter sa stock cooperative asin kaipuhan an quorum na 25 por ciento kan mga miembros consumedores na imposibleng mangyari huli ta an consumedores dai interesado na mag-atendir sa pinapaapod na asemblia na haros pinaka-langkaw na an l,000 na-atendir.

        Pigbuyagyag pa na apesar na pigtawan nin sarong taon na extension kan CDA an mga cooperativa nin corriente sa pagpa-registro dai man giraray nagsunod. Kun igwa nang ngipon mapipiritan na sindang magcomple kan ley.

        Afuera pa kaini, igwa nang resolucion an PCC na naghuhurot sa Congreso na ipasa-irarum an NEA sa CDA nganing magsunod sinda sa mandato kan ley asin dapat igwa sanang sarong agencia na maregistro asin ma-regulate kan mga cooperativa.

        Sa presenting reglamento an supervicion kan mga cooperativa nin corriente nasa lindong kan NEA na iyo pa an nagcocontra na magpa-registro sa CDA.

        Oficiales kan coop malalaom sa carcel, mamulta kun masinutil.