An Ciudad nin Naga iyo an posibleng maging presentador kan 6th National Organic Agriculture Conference sa taon 2009, pighahalat nalang an ipapaluwas na decicion kan National Organic Agriculture Board na pinamamayohan ni Director Gilbert Layese kan Bureau of Fisheries and Product Standard (BAFPS).

        Si dating Consejal Julian Lavadia, Jr. kan Ciudad nin Naga, Executive Director kan Natural Farming Society sa Camarines Sur nagsabi na sinda nagsubasta sa ginibong 5th National Organic Agriculture Conference na ginibo sa Ciudad nin Davao kan Octubre 16, 17 nganing madara digdi sa ciudad an masunod na tiripon kan mga envuelto sa organic farming.

        Mga oficiales local, non-government organization, people’s organization, department of agriculture asin organic practitioners an naging participantes sa sinambit na conferencia.

        Pigkakarkulo na maabot sa 600 asta 1,000 an ma-atendir na hali sa Luzon, Visayas asin Mindanao

         An Ciudad nin Bacolod an karibal kan Naga alagad posibleng magsibog kan pag-host kan conferencia mientras na pigpapabor an ciudad na ini.

        Kaibahan ni Lavadia sa pagsubasta iyo sinda Rev. Fr. Gramwell Pitapit, Social Action Director kan Prelatura of Libmanan Development Foundation Inc. asin si Rev. Fr. Ian Trillanes, kan parokia kan Del Gallego, Camarines Sur. Sinda envuelto sa organic agriculture nganing mapahiwas an produccion kaini sa provincia.

        An organic fertilizer dakulang tabang sa mga paraoma huli ta hababa an precio asin mayo pang mga chemical na ginagamit sa pagproducir. Dikit an gastos, dakula an ingreso, sabi pa kan dating consejal.

        Si Lavadia, activo sa pagpahiwas nin produccion nin kalongay sa Camarines Sur asin pigsabayan na kan organic agriculture.

        Sa ginibong pinaka-enot na Organic Food Conference sa Ciudad nin Naga kan nakaaging semana na pig-atendiran kan manlaen-laen na sectores asin oficiales local saindang pigtawan nin halaga sa ngonian an produccion agricultura dapit sa food safety o an pag-ibitaran sa pag-gamit nin mga chemical sa mga tinanum na iyo man sana an ginikikanan nin kahelangan.